Chvalavańni na Traktarnym zavodzie

Pracaŭniki cecha № 91 Minskaha traktarnaha zavoda (MTZ) źviarnulisia ŭ prafsajuz REP z prośbaj padrychtavać dakumienty na imia kiraŭnictva pradpryjemstva ŭ suviazi ź nizkim zarobkam. U toj čas jak u cełym pa zavodzie zarobak padniali na 40%, pracaŭniki malarnaha cecha № 91 ŭ červieni-žniŭni atrymali praktyčna na 20% mienš, čym u lutym hetaha hoda.

— Da nas źviarnulisia pracaŭniki Traktarnaha zavoda ŭ suviazi z tym, što ŭzrovień ichnich zarobkaŭ u paraŭnańni ź lutym hetaha hoda źniziŭsia na 20%. Pryčym nie ŭ pryviazcy da dalara ci rostu cenaŭ, a ŭ biełaruskich rublach,

Pa słovach pracoŭnych, ichni miesiačny zarobak za červień, lipień, žnivień skłaŭ paradku 1,7 młn rubloŭ. U toj čas jak u pačatku hoda jany atrymlivali 2,2 młn rubloŭ na miesiac.

— I heta pry tym, što chutkaść kanviejera była pavialičanaja. Kiraŭnictva cecha zrabiła heta biez papiaredžańnia.

Heta lišni raz dakazvaje, što ŭsim kiraŭnikam na hetych šarahovych pracaŭnikoŭ prosta naplavać.

Pracaŭniki cecha № 91 napisali zajavu na imia dyrektara MTZ Alaksandra Puchavoha, u jakim vykazali niedavier načalniku cecha Amialkovič, paprasili pravieści pazapłanavuju pravierku Biuro pracy i zarobku (BPiZ) z metaj niedapuščeńnia źnižeńnia rascenak i pavysić zarobak nie nižej za adsotkavuju staŭku inflacyi (50%).

«My, pracaŭniki, nie bačym nijakaha imknieńnia z boku načalnika cecha ni ŭ naładžvańni narmalnaj pracoŭnaj abstanoŭki ŭ kalektyvie, ni ŭ spraviadlivaj adznacy našaj pracy. A pra chamskaje staŭleńnie ź jaho boku da nas, pracaŭnikoŭ, my ŭžo i nie kažam, — havorycca ŭ zajavie malaroŭ cecha № 91.

Pavodle infarmacyi Hienadzia Fiadyniča, prablemy ŭ malaroŭ i kiraŭnictva cecha ŭźnikali i raniej. Pracaŭniki raskazali prafsajuznamu lidaru, što ŭ 2008 hodzie, kali Amialkovič uznačaliŭ cech № 91, u ich niezakonna zabrali dadatkovyja 7 dzion da adpačynku, jakija byli vyłučanyja za pracu ŭ škodnych umovach. Malary MTZ pracujuć u ciepłavych kamierach pry tempieratury vyšejšaj za 100 hradusaŭ. U pačatku hetaha hoda pracaŭniki sami, biez dapamohi dziejnaha na MTZ aficyjnaha prafsajuza rabotnikaŭ ASM, damahlisia praviadzieńnia pazačarhovaj atestacyi pracoŭnych miescaŭ, u vyniku jakoj im byli viernutyja dadatkovyja 7 dzion da adpačynku.

Na dumku staršyni prafsajuzu REP, nizkija zarobki mohuć być śledstvam aktyŭnaści pracoŭnych.

— My nie vyklučajem taho, što heta, mahčyma, pieraśled z boku kiraŭnictva cecha. A jak inakš rastłumačyć, što pry ŭsich vyšejpieraličanych arhumientach ŭ kvalifikavanych supracoŭnikaŭ zarpłata nižejšaja, čym u dapamožnych? Tamu niedavier malaroŭ da načalnika cecha i da BPiZ całkam abhruntavany, — padsumavaŭ Hienadź Fiadynič.

U adrasavanym dyrektaru zavoda zvarocie pracaŭniki papiaredžvajuć:

«Kali paśla našaj zajavy da Vas, nie buduć zadavolenyja našyja spraviadlivyja patrabavańni, a z boku kiraŭnictva cecha A. I. Amieljanoviča pačnucca hanieńni, hrubaje staŭleńnie i nieapraŭdanaje niepradaŭžeńnie kantraktaŭ da padpisantaŭ zajavy, my pakidajem za saboj prava źviarnucca ŭ adpaviednyja vyšejstajačyja i kantrolnyja orhany Respubliki Biełaruś».

• 0
• 0
• 0
• 0
• 0
• 0
• 0
• 0