Samyja pryhožyja dziaŭčaty Biełarusi naradžajucca ŭ Klejnikach?
«Mis Biełaruś-2012» Julija Skałkovič akazałasia nie adzinaj uradženkaj vioski Klejniki, jakaja atrymała tytuł samaj pryhožaj dziaŭčyny Biełarusi.
Dziesiać hadoŭ tamu karonu ŭ siało pryviezła i Volha Nieŭdach.
Adrazu dźvie pryziorki konkursu «Mis
Jak vyśvietliła «Jeŭraradyjo», u 2002 hodzie karonu «Mis Biełaruś» atrymała jašče adna ŭradženka vioski Klejniki — Volha Nieŭdach.
«Samim dziŭna — mahčyma, u nas pavietra takoje asablivaje ŭ vioscy, — śmiajecca nastaŭnica miascovaj škoły Alena Malaŭka. — Mabyć, heta hienietyčna zakładziena — u ich baćki vielmi pryhožyja. Nie viedaju, prosta pryhažuni jany, i ŭsio!»
Dyrektar miascovaj škoły mastactvaŭ Valeryj Radzivonaŭ upeŭnieny, što zavajavać karonu pieršaj pryhažuni Julii Skałkovič dazvoliła nie stolki pryrodnaja pryhažość, kolki «cnatlivaść».
«Viedajecie, za što, mnie zdajecca, joj dali „Mis Biełaruś“? Tamu što jana adzinaja, u kaho na tvary, i naohuł usiudy, napisana „cnatlivaść“. I intelekt, — rastłumačyŭ Radzivonaŭ. — Jość katehoryja ludziej, hatovych pa hałovach iści, aby tolki zavajavać hetuju karonu. A jana nie z tych. Joj važna było daviedacca, što jana sama moža. I hetyja schavanyja kamiery, jakija byli na „Mis Biełaruś“ sioleta, jany i pakazali ŭsiu padnahotnuju bolšaści: chto kuryć, chto nie kuryć, chto pje, chto łajecca matam, a chto — nie. Chto hatovy pa hałovach iści, a chto prosta cicha robić svaju spravu».
Ad svajoj byłoj vučanicy dyrektar škoły mastactvaŭ u zachapleńni. I maluje jana vielmi dobra, i pačućcio kampazicyi maje, i lalki pryhožyja sama šyje. Charaktar u jaje dobrazyčlivy, tavaryski. Chłopcy za joj biehali, ale nikoha blizka nie padpuskała — biez kachańnia nijakich volnaściaŭ. I da navučańnia vielmi zdolnaja.
Navat raskazvaje, što Julija chacieła admovicca ad dalejšaha ŭdziełu ŭ konkursie, paśla taho jak atrymała va ŭniviersitecie pa adnym z pradmietaŭ… šaściorku. Cełaj sielskaj delehacyjaj uhavorvali nie sychodzić z dystancyi.
«Jana vučycca vyklučna na 10, 9, 8. I pa adnym z pradmietaŭ u vyniku hetaha konkursu ŭ jaje atrymałasia šaściorka. Dyk voś jana praz hetuju šaściorku i chacieła konkurs kidać. I pryjazdžali my, i ŭsie jaje ŭhavorvali: «Raz pačała, to i zakančvać treba hetuju spravu», — kaža Valeryj Radzivonaŭ.
Zvyčajnuju viaskovuju bazavuju škołu Julija Skałkovič nie naviedvała — vučyłasia ŭ škole № 7 Bresta. Ale supracoŭniki klejnikaŭskaj škoły dziaŭčynu viedajuć dobra — jaje mama pracuje ŭ sielskaj škole nastaŭnicaj pačatkovych kłasaŭ. I dziaŭčyna naviedvała mamu na pracy, kaža Alena Malaŭka.
«Jana vielmi pracavitaja. U ich aharod, i jany razam z mamaj pačynajuć i ŭvieś siezon pracujuć. Tam u ich kvietki, hazon, karaciej, usia hetaja haspadarka padsobnaja na jaje z mamaj rukach. Ale biez kurej i parasiat», — kaža nastaŭnica.
Jak raskazali «Jeŭraradyjo» adnaviaskoŭcy Julii, z konkursu jana viarnułasia dadomu ŭpotaj, praktyčna nočču. Adklučyła ŭsie telefony i z doma jašče nie vychodziła. Maŭlaŭ, stamiłasia ad cikavaści presy i publiki. Hetaja zvyšuvaha stała pryčynaj taho, praz što dziaŭčyna druhi raz chacieła admovicca ad udziełu ŭ konkursie.
A tym časam u miascovym Domie kultury dadali novy stend da ekspazicyi hanarovych adnaviaskoŭcaŭ. Fota «Mis
Darečy, «Komsomolskaja pravda» vyjaviła, što novaja karaleva pryhažości - kopija italjanskaj aktorki. Tonieńkaja, ładnieńkaja, kopija Mikieły Kvatračokie (hałoŭnaja hierainia filma «Prabač za kažańnie»). U nas hetaja aktorka nie vielmi viadomaja, a voś u Jeŭropie — na piku papularnaści.
— Ciapier papularnyja brunetki ź zialonymi vačyma i biełaj skuraj, — patłumačyła nam člen žury nacyjanalnaha konkursu pryhažości Tamara Hančarova, haspadynia madelnaha ahienctva (studyja «Tamara»). — Šukali dziaŭčynu z dobrym charaktaram i charyzmaj. Jula, mnie zdajecca, pasuje pad hetyja paramietry. Mnie zdajecca, što jana padychodzić pad typaž słavianskaj biełaruskaj dziaŭčyny. U joj jość šarm i siła, kab pracavać i raźvivacca. Praŭda, joj varta było b schudnieć jašče - šyrakavataja ŭ ściohnach. Varta było b pazajmacca płavańniem i fitnesom, — miarkuje Hančarova.
Kamientary