Źbity za nacyjanalny ściah Andrej Moŭčan zastajecca ŭ balnicy
Milicyja jaho zatrymańnie nie kamientuje.
Kaardynatar hramadianskaj kampanii «Jeŭrapiejskaja Biełaruś» Pavieł Juchnievič paviedamiŭ, što Andrej Moŭčan znachodzicca ŭ balnicy chutkaj miedycynskaj dapamohi.
Andreja Moŭčana zatrymali ŭviečary 19 maja ŭ staličnym rajonie Uručča. Aktyvist «Jeŭrapiejskaj Biełarusi» vyjšaŭ na vulicu ź bieł-čyrvona-byłym ściaham u znak salidarnaści z palitviaźniem Siarhiejem Kavalenkam. Jon ruchaŭsia z uźniatym ściaham ad univiersama «Pieršamajski» da vulicy Rusijanava. Nijakich łozunhaŭ jon nie vykrykvaŭ. Jon admoviŭsia siadać u mašynu na patrabavańni milicyjantaŭ biez tłumačeńnia pryčyny zatrymańnia.
Kali aktyvista siłaj zapichvali ŭ mašynu, jaho mocna pataŭkli.
Pra heta jon raskazaŭ siastry, jakuju puścili da jaho ŭ 11-ju balnicu.
U pastarunku Andreju pahražali kryminalnaj spravaj nibyta za abrazu prezidenta i źbićcio supracoŭnika milicyi.
Juchnievič ličyć, što nijakaja kryminalnaja sprava ŭ adnosinach da Andreja nie budzie raspačata.
Pa jaho słovach, milicyjanty nadta brutalna zatrymali aktyvista, i ciapier im, napeŭna, daviadziecca davać tłumačeńni ŭ prakuratury. I tamu jany pasprabujuć «zabycca» pra incydent.
Pavieł Juchnievič padkreśliŭ, što pravodziłasia ekśpierptyza, jakaja paćvierdziła, što
Moŭčan na momant zatrymańnia byŭ ćviarozym.
Pres-sakratar HUUS Minhravykankama Alaksandr Łastoŭski zajaviŭ, što nie maje «nijakaj infarmacyi».
A tamu prakamientavać ničoha nie moža.
Kamientary