Biełaruskaja madel ekanamičnaha rostu dasiahnuła svaich miežaŭ.
Takaja vysnova ŭtrymlivajecca ŭ Krainavym ekanamičnym miemarandumie dla Biełarusi, jaki ekśpierty Suśvietnaha banka prezientavali ŭ Minsku 10 lipienia.
U apošniaje dziesiacihodździe, havorycca ŭ miemarandumie, tempy ekanamičnaha rostu ŭ Biełarusi byli davoli vysokimi i składali ŭ siarednim prykładna 8% u hod.Dziakujučy hetamu krainie ŭdałosia istotna źmienšyć uzrovień biednaści — z 47% u 1999 hodzie da 5% u 2010 hodzie.
Adnak, adznačajuć ekśpierty, ekanamičny rost u apošniaje dziesiacihodździe zabiaśpiečvaŭsia ŭ Biełarusi najpierš za košt faktaraŭ, jakija nie spryjali pavyšeńniu kankurentazdolnaści nacyjanalnaj ekanomiki.
Adnoj z asnoŭnych pryčyn ekanamičnaha rostu ŭ Biełarusi byli tannyja enierhanośbity.
«Na praciahu ŭsiaho pieryjadu 2001–2010 hadoŭ ekanamičnaja madel abapirałasia na pastaŭki enierhanośbitaŭ z Rasii pa zanižanych cenach, pryčym siaredniehadovy pamier umoŭna naličanaj subsidyi pieravyšaŭ 13 pracentaŭ VUP», — skazana ŭ dakumiencie.
Atrymlivajučy enierhanośbity pa lhotnych cenach, Biełaruś, tym nie mienš, nie skarystałasia hetaj pieravahaj dla pavyšeńnia svajoj kankurentazdolnaści, što «zvuziła pierśpiektyvy dla Biełarusi znajści novyja krynicy rostu», padkreślivajuć ekśpierty Suśvietnaha banka.
«Źnižeńnie pradukcyjnaści i kankurentazdolnaści ŭkazvaje na toje, što Biełaruś nie zdoleła pravieści strukturnuju madernizacyju svajoj ekanomiki, pavialičyć jaje kankurentazdolnaść i znajści alternatyŭnyja krynicy dachodu. Nie zdoleŭšy likvidavać svaje źniešnija dysbałansy, kraina za apošnija try hady pieražyła dva kryzisy», — havorycca ŭ miemarandumie.
Pavodle mierkavańnia ekśpiertaŭ Suśvietnaha banka, Biełarusi nieabchodna pajści na strukturnyja reformy, što dazvolić vyrašyć niekalki fundamientalnych prablem, a mienavita:pieraraźmierkavać pracoŭnyja resursy i kapitał na karyść siehmientaŭ ekanomiki z vysokaj pradukcyjnaściu; ažyćciavić restrukturyzacyju siektara dziaržpradpryjemstvaŭ; pavialičyć rolu pryvatnaha siektara i siektary pasłuh u ekanomicy.
«Paśpiachova vyrašyŭšy hetyja zadačy, Biełaruś ažyvić svaje kankurentazdolnyja siehmienty ekanomiki i raskryje niavykarystanyja mahčymaści dla ekanamičnaha rostu. Heta taksama skarocić zaležnaść ekanomiki ad pastavak enierhanośbitaŭ z Rasii pa zanižanych cenach i dazvolić joj padniacca ŭvierch u łancužku stvareńnia koštu ŭ miežach suśvietnaj intehracyi», — miarkujuć ekśpierty Suśvietnaha banka.
Kamientary