Chity nejminhu pa-biełarusku: «Kapkan Inviest», «Raśpił Hrup» i «Čarviačok»

Modny zachodni termin «nejminh», jaki aznačaje pasłuhi pa stvareńni hučnych i zapaminalnych nazvaŭ dla pradpryjemstvaŭ i prajektaŭ, viedajuć daloka nie ŭsie biełaruskija pradprymalniki.

Ale na praktycy im i biez tearetyčnaj bazy jość što «skazać» klijentam i kankurentam u nazvach kampanij.

U Adzinym rehistry jurydyčnych asob i indyvidualnych pradprymalnikaŭ, dadzienyja ź jakoha za studzień-žnivień 2012 hoda vykarystoŭvalisia dla daśledavańnia, usplosk jarkich i zapaminalnych prypadaje na pieršyja dva miesiacy hoda. Čamu? Adzin varyjant — paleźli na śviet nazapašanyja i prychavanyja da novaha hoda idei. Druhi — usplosk kreatyŭnaści abumoŭleny zaciažnymi navahodnimi śviatami i ŭsim, što ź imi źviazana.

Numaram adzin prapanujem ličyć nazvu «Meblevaja fabryka «Raśpilini».

Druhoje miesca našaja konkursnaja kamisija addała aŭtaru nazvy stancyi techničnaha absłuhoŭvańnia — «STO k odnomu» ŭ Vilejcy.

Treciaj stała zadumka minskaha pradprymalnika, što zarehistravaŭ kampaniju «ZaDarma». My tak i nie pryjšli da adzinaha mierkavańnia, što aznačaje nazva — biaspłatna abo ŭ padarunak. Ale ŭ abodvuch čytańniach, pahadziciesia, hučyć pryjemna.

U pieršuju piaciorku ŭvajšli Pietrykaŭskaja budaŭničaja kampanija «Alfa inžynier», a taksama «Krama padarožžaŭ «Kudybaj».

Paralelnyja śviety

Ale davodzicca pryznać, što vialikaj aryhinalnaściu ŭ vydumlańni nazvy dla svaich biznesaŭ biełarusy nie vyłučajucca. Za asnovu čaściakom biarucca najaŭnyja idei, jakija prystasoŭvajucca da profilu biznesu.

Jak prykład,

samaje modnaje sioleta słova ŭ naźvie kampanij — «śviet».

Za 2012 źjavilisia fiermierskaja haspadarka «Śviet straŭsaŭ», a taksama «Śviet myjek», «Śviet pierson», «Śviet turaŭ», «Śviet klimatu», «Śviet śviata», «Śviet pryčosak», «Śviet zvarki», «Śviet mocnych mašyn», «Śviet dastavak», «Śviet bambuka», «Śviet palimieraŭ», «Śviet filtraŭ». Zarehistravany taksama «Śviet nažoŭ» i fiłasofski «Śviet u vašych rukach».

Hieahrafičnaje

Pa idei, dobra tam, dzie nas niama. Mahčyma, i hetym faktaram dzieści na padśviadomym uzroŭni abumoŭlivajecca vybar na karyść hieahrafičnych nazvaŭ. Jak praviła, u dalokim zamiežžy.

Tak, ciaham 2012 hoda «hieahrafija» biełaruskaha biznesu «pašyryłasia» za košt firmaŭ «Redžyna Styl», «Arkanzas-Bieł», «Manrovija», «San-Dyjeha», «Hvadałachara», «Taškient Hrup», «Halikarnas» , «Hielendžyk», «Havana», «Aksitanija», «Arlean», «Techas Sici», «Buenas-Ajres», «Kioln» i «Ńjukasł».

Dźvie nastupnyja nazvy nie majuć dačynieńnia da hieahrafičnych, ale hetyja biznesy raźmieščanyja ŭ susiednich rajonach. My prosta nie zmahli prajści mima ich, jany dapaŭniajuć adzin adnaho:

adzin ź fiermieraŭ Staradarožskaha rajona ŭziaŭ dla svajoj haspadarki nazvu «Dziesiać parasiat», jaho susied sa Słuckaha — «Vaŭčynaja radaść».

Boskaje

Pryciahnieńnie bahoŭ u dapamohu — jašče adzin, možna skazać, intelektualny trend nejminhu pa-biełarusku.

U Minsku jość ciapier pradpryjemstva «Mamona-pra». Mamona — heta staražytnasiryjskaje bostva, jakoje ŭvasablaje bahaćcie i ziamnyja vyhody.

Inšaha pradprymalnika paciahnuła na hreckuju mifałohiju, i jon prydumaŭ «Hiekata-pram». Bahinia Hiekata, jak viadoma, doryć mudraść, pośpiech na vajnie i bahatuju zdabyču na palavańni.

«Astarta łahistyk» — śviadoma ci nie ŭvabrała ŭ siabie imia bahini kachańnia i ŭłady z šumierskaha i finikijskaha panteona.

Čym zajmajecca kampanija «Anubiskom», nieviadoma. A tak Anubis — heta staražytnajehipieckaje bostva, pravadyr pamierłych u zamahilny śviet i zachavalnik mohiłak, jadaŭ i lekaŭ. A voś bresckija pradprymalniki, jakija zarehistravali firmu «Charon — rytualnaja słužba», adrazu dali zrazumieć, čym jany zajmajucca.

Ale ŭsio ž samaj jarkaj nazvaj i ŭ katehoryi «Boskaje», i, mahčyma, usiaho hoda možna ličyć «vynachodstva» nieviadomych pradprymalnikaŭ z Połacka.

Jany nazvali svaju kampaniju «Pandoraservis».

Pavodle mifa, ad muža Pandora daviedałasia, što ŭ domie jość skrynia, jakuju ni ŭ jakim razie nielha adkryvać, i kali parušyć zabaronu, uvieś śviet i jaho nasielnikaŭ čakajuć nieźličonyja biedy. Ale cikaŭnaść pieramahła, jana adkryła skryniu, i biedy abrynulisia na śviet. Kali Pandora zakryła skryniu, to na dnie jaje, pa voli Zieŭsa, zastałasia tolki nadzieja. Što za «servis» prapanuje połackaja «Pandora», možna tolki zdahadvacca.

Aprača nabožnych nazvaŭ u rehistry sustrakajucca i nazvy ŭ honar realnych histaryčnych postaciaŭ. Naprykład, u honar Ałarycha — cara viesthotaŭ, jaki ŭziaŭ Rym. Kampanija «SarhonArt» uvabrała ŭ siabie imia ci to Sarhona akadskaha, abjadnalnika staražytnaj Miesapatamii, ci to Sarhona II, jašče bolš viadomaj histaryčnaj piersony — asiryjskaha cara-zavajoŭnika.

Hipierbaličnaje

Dastatkova šmat kampanij, u čyjoj naźvie apisvajecca sama pasłuha ci jaje jakaść: «Ciopleńka», «Lohka», «Hruzi-viazu», «Ješpi», «Myju sam», «Sprytna», «Kupi-pradaj».

Nie abychodzicca biez hullivaści: «Dačny ŭhodnik», «BieST», «Dźvie krasuni», «Ružovaja pančocha» i navat «Damina».

Ale jašče bolš nazvaŭ, praź jakija aŭtary sprabujuć danieści pieravahu taho, čym jany zajmajucca.

Voś niekalki takich prykładaŭ maštabnaści — «Hołas Hałaktyki», «Kod čyścini», «Charyzma plus», «Dobry Hienij».

A jašče jość «Radaść pryhažości», «Vialiki pačyn», «Kibier-intelekt», «HipierAhra», «Viaršynia hustu», «Zahurman», «Bilijanier», «Niabiesnaja daskanałaść», «Prosta mara» i, narešcie, supierchity ŭ hetaj rubrycy — «Raźvićcio budučyni» i «Vychavańnie vialikim».

Zrešty, jość i advarotnyja prykłady. Cikava, pra što dumali aŭtary, kali rehistravali svajo pradpryjemstva pa akazańni pasłuh z nazvaj «Siem bałaŭ»? Pavodle sučasnaj školnaj acenačnaj škały (a mienavita jana pieršaj prychodzić u hałavu), uzrovień ich pasłuh — na troječku ź plusam ci čaćviorku ź minusam.

Biełaruskaje

Nazvaŭ kampanij na biełaruskaj movie navat u ruskaj transkrypcyi pa-raniejšamu mała. Pryhožych — jašče mienš.

Biełaruskaść vyjaŭlajecca abo ŭ vyhladzie nazvaŭ «Biełkonhrieśśmien», «Rośbiełsijanije», «Biełanałohija», albo ŭ abyhryvańni nacyjanalnaj stravy — «Bulbatronik», «Bulba-šou», «Bulba łabs».

Jość jašče «Litvinski mahnat» i «Kupalle Cholidej Indastry». Ale najlepšym biełaruskim prajektam, na naš subjektyŭny pohlad, u razhladanym pieryjadzie stała nazva «Kvietki jabłyni inviest». Hetaja kampanija zarehistravanaja ŭ Minskim rajonie.

Našmat bolš nazvaŭ na bazie anhielskaj i inšych movaŭ: «Sani Biear», uździenskaja «Ajran Brejn», «De luksvakans» ź Pinskaha rajona, «Hoŭ Bałtyk Bieł», «Hudbaj trans», «Chepi Enimałs».

Chto pandoryściejšy

U «Pandoraservis», jakuju my vydzielili ŭ admysłovy rejtynh samych sprečnych nazvaŭ, u 2012 hodzie ŭžo jość surjozny kankurent.

Heta «Čorny delfin» z Červieńskaha rajona. Luby pašukavik vydaść, što «Čorny delfin» — heta znakamitaja kałonija dla asudžanych pažyćciova pad Sol-Ileckam.

Urazili nazvy Pryvatnaha handlovaha ŭnitarnaha pradpryjemstva «Čarviačok» u Babrujsku i viasielnaha sałona «Vintaž» u Minsku.

Taksama ŭ hetuju rubryku my ŭnieśli nazvy mahiloŭskaj kampanii «Raśpił Hrup» (a-la Navalny) i hłybocki «Kapkan inviest».

Zahadkavyja

Niezrazumietymi, jak ni sprabavali, zastalisia nazvy «Niejtryna Ket», «Źviary ŭ horadzie» (Homiel) i «Žyvaja ježa».

Taksama niezrazumieła, čym moža zajmacca mazyrskaja firma «Fiestyna łente» (z łaciny — «Śpiašajsia pavolna»).

I «Čva-Chva-Chva» — heta niešta dziciačaje?

A «Ciopły śnieh» — dobraje?

• 0
• 0
• 0
• 0
• 0
• 0
• 0
• 0