Siońnia, u paniadziełak, pačynajecca vizyt u Vialikuju Brytaniju kiraŭnika palityčnaj rady Abjadnanych demakratyčnych siłaŭ Alaksandra Milinkieviča.
Pierad adlotam u Londan Alaksandar Milinkievič raskazaŭ pra prahramu svajho znachodžańnia ŭ Vialikaj Brytanii:
«Heta aficyjnaje zaprašeńnie naviedać Złučanaje Karaleŭstva. Padčas vizytu budzie sustreča ź ministram u spravach Eŭropy Džefam Chunam, adbuducca pieramovy ŭ MZS i parlamencie. Taksama buduć sustrečy ŭ Instytucie słavianskich daśledavańniaŭ, presavaja kanferencyja, vystup na VVS. I jašče — sustreča ź biełarusami Vialikaj Brytanii. Usia pajezdka zojmie čatyry dni».
Z toj pary, jak Alaksandar Milinkievič pačaŭ udzielničać u prezydenckaj vybarčaj kampanii, heta jahonaja pieršaja pajezdka ŭ Londan. Admietnaść hetaha vizytu staršynia abjadnanych demsiłaŭ Biełarusi bačyć u nastupnym:
«Vialikaja Brytanija zaŭsiody zajmała vielmi pryncypovuju dy ćviorduju pazycyju adnosna Biełarusi. I ja dumaju, što paśla prezydenckich vybaraŭ u Francyi, i ŭličvajučy takuju ž pazycyju Niamieččyny, heta budzie i supolnaj pazycyjaj Eŭropy. Pazycyja viadomaja: Eŭropa — adkrytaja, ale Biełaruś musić rabić kroki ŭ kirunku demakratyi.
I akramia taho, ja raźličvaju na pašyreńnie supracoŭnictva Vialikaj Brytanii z demakratyčnymi siłami Biełarusi».
U Francyi tydzień tamu abrany novy prezydent, voś‑voś źjavicca novy premjer u Vialikaj Brytanii, paraŭnalna niadaŭna prajšła źmiena kanclera ŭ Niamieččynie. Alaksandar Milinkievič asabista znajomy i z kanclerkaj Anhiełaj Merkiel, i z prezydentam Nikala Sarkazi. Z novym kiraŭnikom Francyi Milinkievič sustrakaŭsia letaś, u vieraśni, kali Sarkazi jašče ŭznačalvaŭ ministerstva ŭnutranych spravaŭ Francyi. Tady ŭ Marsieli Nikala Sarkazi kazaŭ pra toje, što na mapie Eŭropy jość takija krainy, jak Biełaruś, dzie niama svabody dy demakratyi, dzie ŭłada vykarystoŭvaje represii suprać ułasnaha narodu. Jon taksama kazaŭ, što Eŭropa musić źmianić svajo staŭleńnie da Biełarusi, što maralnych žestaŭ siońnia niedastatkova, nieabchodna palityčnaja abarona demakratyi ŭ Biełarusi. I dziela hetaha patrebna skarystoŭvać dyplamatyčnyja mahčymaści krainaŭ Eŭraźviazu.
Pavodle Alaksandra Milinkieviča, jon abaviazkova nahadaje hetyja słovy i svaim surazmoŭcam u Londanie.
Kamientary