Paźniak raskryŭ novyja łubianskija karty

Lider KCHP‑BNF nazyvaje Milinkieviča byłym prajektam Maskvy i vykazvaje zaściarohu, što toj moža ačolić moładzievy ruch. Apazycyju Paźniak vinavacić u «niepradrašenstvie».

U padrychtavanym da červieńskaha Sojmu KCHP‑BNF vystupie Zianon Paźniak nazyvaje prezydenckija vybary 2006 hodu «łubianska‑kramloŭskim prajektam hrupy Paŭłoŭskaha». Pavodle Paźniaka, Kanhres farmalna kanstatavaŭ, što Milinkievič, jak i Kazulin, całkam vykanali svaju rolu ŭ hetym prajekcie i pavinny adyści.

Zianon Stanisłavavič adznačaje ŭzmacnieńnie levych i adkryta pramaskoŭskich siłaŭ u apazycyi. Havoračy pra Milinkieviča, sp. Paźniak vykazaŭ zaściarohu nakont imknieńnia apošniaha uznačalić moładzievy ruch: «Ale naściarožvaje toj fakt, što adpracavany lidar pačaŭ vyjaŭlać niedvuchsensoŭnuju schilnaść uznačalić Biełaruski nacyjanalny maładziovy ruch (zajaviŭ navat, što ŭstupaje ŭ Małady Front). Možna skazać dakładna, što Milinkievič atrymaje mahčymaść upłyvać i nakiroŭvać Małady Front, sprava nie abmiažujecca «mob‑šmobami». Praź niejki čas ruch zahoniać u ślapy zavułak i jon rassypiecca na drobnyja častki».

Paźniak nazyvaje Milinkieviča «funkcyjaneram ź cichim hołasam i miakkaciełaj uśmiešačkaj» i zakidaje tamu raskoł haradzienskaj arhanizacyi BNF, stvareńnie kankurencyi ŭ asobie Siamiona Domaša staršyni BNF na vybarach u 2001 h.

Apazycyju Zianon Paźniak vinavacić u «niepradrašenstvie» (mabilizacyi roznych pratestnych siłaŭ tolki na bližniaj mecie). Palityk pravodzić paraleli z padobnaj idealohijaj, «raspracavanaj demakratami‑šavinistami jašče ŭ peryjad pamiž 1‑j i 2‑j Suśvietnymi vojnami». Padobna rasiejskim emihrantam, što «imknulisia abjadnać usich uciekačoŭ z SSSR na baraćbu z balšavizmam, nie vyznačajučy (nie priedriešaja), što budzie paśla pieramohi», «pseŭdaapazycyja zusim nie «zmahajecca» z palityčnaj ahresijaj Rasiei, z pahrozaj niezaležnaści Biełarusi, vyniščeńniem biełaruskaj kultury i biełaruskaha nacyjanalnaha žyćcia. Jany vystupajuć tolki suprać dyktatury Łukašenki».

Na dumku Paźniaka, Zachad praciahvaje padtrymlivać antybiełaruskuju palityku Maskvy: «Zachad, jak i ŭ XX stahodździ, zaŭsiody padtrymlivaŭ niepradrašenstva rasiejskaha imperyjalizmu, etnacydu biełarusaŭ, palityčnaj ahresii Rasiei — sutnaść kanfliktu jon va ŭpor nia bačyŭ i nie chacieŭ bačyć, bo heta nie adpaviadała jahonym intaresam. Niepradrašenskaja kvaziapazycyja vyhadnaja i Zachadu, i Maskvie».

Siamion Piečanko

Prostaja mova:
Z. Paźniak: «Uvohule, my niedaaceńvajem hetaha funkcyjaniera, ašukaŭšysia jaho cichim hołasam i miakkaciełaj uśmiešačkaj. U 90‑ch hadach, kali jaho nakiravali z vysokaj namenklaturnaj pasady «ŭ demakratyju» ačolvać «resursny centr» i arhanizacyju «Ratuša», mienavita jahonaja «resursnaja» dziejnaść najbolš paspryjała vytoptvańniu samaj mocnaj haradzienskaj arhanizacyi BNF i padrychtavała tam raskoł Fronta. U 2001 h. jon uznačaliŭ kamandu Domaša, jakoha «adpaviednyja siły» (budziem tak kazać) vystavili admysłova suprać staršyni BNF. Prajekt kramloŭskaj hrupy Paŭłoŭskaha ŭ 2006 hodzie jon vykanaŭ vielmi dobra i pa «płancy» i pa vyhasańni pratestnych nastrojaŭ (toje ž samaje i ŭ hetym hodzie — 25 sakavika, prapanovy supracoŭnictva z Łukašenkam, padtrymka rasiejskaj palityki ŭ Biełarusi i h.d.).»

• 0
• 0
• 0
• 0
• 0
• 0
• 0
• 0