Novy klip Pita Paŭłava — siońnia na MTV

Narešcie na Biełarusi źjaviŭsia muzyčny klip, što praktyčna ni ŭ čym nia sastupaje vysakajakasnym zamiežnym videa — chiba tolki maje kudy mienšy biudžet. Ja maju na ŭvazie klip hurta GARADzKIJA «Kaŭbasić dy pluščyć». Prezentacyja videarolika adbudziecca ŭ piatnicu 15 červienia ŭ 21:30 na kanale biełaruskaha MTV. Pra toje, jak i dzie prachodzili zdymki, chto prykłaŭ da ich svaju ruku i adkul u klipie stolki pryvabnych dziaŭčyn, «Tuzinu Hitoŭ» raspavioŭ lider hurta — «haradzki» čałaviek, staličny modnik i znakamity hitaryst Pit Paŭłaŭ.

«Scenar klipu ja trymaŭ u hałavie hady try, — kaža Pit. — Ale na toj čas na jahonyja zdymki nie było hrošaŭ. Dakładniej, srodki byli, ale nie takija vialikija, kab źniać usio tak, jak ja heta bačyŭ». Mahčyma, z taje pryčyny i źjaviŭsia klip na pieśniu «Jak manekien», źniaty adnym planam — pamiatajecie, u im Pit siadzić na prypynku — «jak manekien» — i čahości čakaje. Siadzić ceły dzień i čakaje, pakul ludzi śpiašajucca pa svaich spravach. «Ale mienavita «Kaŭbasić dy pluščyć» musiŭ stać našaj vizytnaj videakartkaj».

Rolik zrobleny vielmi jakasna i sapraŭdy vyhladaje niatanna — zrazumieła ŭ miežach našych biełaruskich realijaŭ.

«Doŭhi čas my šukali dobraha režysera, jaki b zdoleŭ źniać usio tak, jak ja sam sabie heta ŭjaŭlaju. Narešcie Ŭładzimier Maksimkoŭ paraiŭ źviarnucca da Juryja Stajuničava. Śpiarša my sumniavalisia, bo Jury nikoli specyjalna nie zajmaŭsia muzyčnym videa. Dobra, što pahadzilisia — atrymałasia toje, što atrymałasia». Pradusaram vystupiŭ čałaviek ź imiem Bahdan.

Siužet nastupny: hieroj Pita pračynajecca zranku ŭ svaim łožku i, musić, nie zusim paznaje dziaŭčynu, što lažyć pobač — «zdavałasia, paśpieješ tolki vočy raspluščyć, jak adrazu pačynaje ciabie kaŭbasić dy pluščyć...» — jon chucieńka apranajecca i vychodzić z chaty. Traplaje jon na hlamurnuju paci, dzie jahonyja siabry «zapalvajuć» u kampanii tuzina vielmi pryhožych dziaŭčyn. «My ładzili specyjalny kastynh — u kadar trapili samyja pryvabnyja. U majoj hałavie ŭvieś čas kruciŭsia adzin z klipaŭ Pussycat Dolls, dzie jany tańčać i katajucca na mašynie».

Biełaruskija dziaŭčyny apynulisia ničym nia horšymi za amerykanskich «lalek» — hlamurna apranutyja, ź jakasnym jaskravym mejk‑ap'am i stylovymi fryzurami, jany ŭśmichalisia ŭ kamery, ablizvali vusny, paciahvali darahija kaktejli i zusim pa‑halivudzku pierakidvali svaje doŭhija nohi.

Ale dziavočaje charastvo nia nadta cikavić našaha hieroja — jon nakiroŭvajecca da kamputara z paznavalnyja loham ADSL.BY (a mienavita jany pakryli značnuju častku vydatkaŭ na zdymki videa) i praź jaho traplaje… na dach! Tam užo jaho čakajuć muzykanty, i ich usich pačynaje «kaŭbasić i pluščyć» u samych lepšych tradycyjach Linkin Park. Aproč ich uzhadvajecca i adzin z klipaŭ rasiejskich «Źviaroŭ». «Ale ŭ ich tam usio vyhladaje nudnavata. Jany prosta stajać na dachu i hrajuć», — kaža Pit. «Haradzkija» ž i skačuć, i tančać, i demanstrujuć fajnaje vałodańnie muzyčnymi instrumentami. Scenu zdymali na dachu doma, dzie mieścicca majsternia Andreja Vialikžanina. «Jon vykładaje ŭ Akademii Mastactvaŭ i vielmi dapamoh nam u niekatorych techničnych pytańniach», — adznačaje Pit. A prabudžeńnie hieroja i viečarynu zdymali ŭ studyi fatohrafa Daniły Parniuka.

Niekatoryja paborniki marali mohuć abvinavaciać Pita ŭ zališnim eratyźmie źmiestu rolika. Maŭlaŭ, zašmat pryhožych dziaŭčyn, zašmat aholenaha cieła (ups!), zanadta zadavolena bliščać vočy ŭ chłopcaŭ… Muzyka z takim mierkavańniem nia zhodny:

«Jakaja erotyka? Usio vielmi ścipła. Mahčyma, adzin taki momant i jość na ŭvieś rolik — kali adna ź dziaŭčyn robić masaž Alezisu».

Ale tut Pit krychu łukavić — voźmiem toj momant, kali hałoŭny hieroj raptoŭna pravalvajecca praz dach i akurat traplaje na kanapu da dźviuch pieknych bliźniatak. Tyja adrazu ž biaruć jaho ŭ svaje abdymki — «a ja nikoli nie biaru da ŭvahi ščyryja siabroŭskija zaŭvahi…». Hieroj kateharyčna admaŭlajecca ad prapanavanych kaktejlu dy cyharety, ale ŭ cełym vyhladaje vielmi zadavolenym.

«Siostraŭ Kasiu dy Volu Karol ja ŭpieršyniu zaŭvažyŭ u «0,5». Nastupnym razam, jak tolki ich ubačyŭ, prapanavaŭ im źniacca ŭ klipie».

Efektnyja brunetki padyšli da spravy vielmi adkazna — padabrali adpaviednuju vopratku i pryviali svaju ŭłasnuju hrymioršu.

Premjera klipa adbuziecca na biełaruskim MTV, u piatnicu a 21:30

Tuzin hitoŭ

• 0
• 0
• 0
• 0
• 0
• 0
• 0
• 0