Мітынг БНФ забаранілі, каб зладзіць пад дажджом велапрабег на развалюхах? - фота
Лідар слуцкай суполкі партыі БНФ Віталь Амяльковіч убачыў, што адбывалася на гарадскім стадыёне замест забароненага мітынгу памяці ўдзельнікаў Слуцкага збройнага чыну.Нагадаем, Слуцкі райвыканкам забараніў Партыі БНФ праводзіць 1 снежня мітынг, бо запланаваў на гэты дзень мерапрыемствы з нагоды Сусветнага дня барацьбы са СНІДам.
Як аказалася, па СНІДу мясцовая вертыкаль вырашыла ударыць велапрабегам і спартыўным арыентаваннем.Праўда, самі чыноўнікі ў велагонках не ўдзельнічалі, саступіўшы месца школьнікам і кадэтам.
Як распавёў «Салідарнасці» заяўнік мітынгу Віталь Амяльковіч, ён прыйшоў на стадыён, каб высветліць, ці на самай справе ўлады правядуць сваё мерапрыемства або адмовілі партыі пад надуманай прычыне.
— Ля ўвахода стаялі два міліцыянты, а на самім стадыёне насіліся на роварах школьнікі і навучэнцы Мінскага абласнога кадэцкага вучылішча, — падзяліўся суразмоўца. — Некаторыя ровары выглядалі напаўіржавымі развалюхамі, іншыя былі цалкам прыстойнымі.
З-за дажджу дарога была слізкая, і дзеці часам падалі. Лёгка можна было атрымаць траўму на такіх гонках!
Праз некалькі хвілін пасля з’яўлення Віталя, да яго падышлі супрацоўнікі міліцыі. Адзін з іх з усмешкай прадставіўся, другі, апрануты ў цывільнае, уключыў відэакамеру.
— Вы атрымалі адказ з Слуцкага райвыканкама аб тым, што мітынг на стадыёне забаронены? — пацікавіўся міліцыянт Шклярэўскі.
— Вы разумееце, што ўсё, што тут можа адбыцца, на вашай адказнасці?
Амяльковіч пацвердзіў, што адказ атрымаў, але адмовіўся несці адказнасць за небяспечныя велагонкі з удзелам дзяцей.
У другой частцы праграмы школьнікі спаборнічалі па спартовым арыентаванні. На думку Амяльковіча, не ўсе хлопцы зразумелі, што адбывалася на стадыёне.
— Я чуў, як дзеці, якія выйгралі кубак, пыталіся ў свайго настаўніка: «Скажыце, а ён залаты? А ў чым мы сёння ўдзельнічалі?» Кампанія старшакласніц, сыходзячы дадому, здзіўлялася: «Навошта мы сюды прыйшлі? Так нічога і не ўбачылі».
Актывісты Партыі БНФ, руху «За Свабоду!» І БХД у гэты дзень у Слуцк не прыехалі, адзначыўшы Дзень герояў падарожжам па месцах, звязаных са Слуцкім паўстаннем, — Семежава, Грозава, Чырвоная Слабада.
Цяпер чытаюць
«Пайшлі нах*й вы і ваш «Бацька», пі***асы!» П'яныя прыгоды зрабілі армяніна Ярванда палітвязнем. Цяпер ён змагаецца з праблемамі ў Польшчы13
Каментары