Лукашэнка: Неспрададзеныя трактары перадаць калгасам

Аляксандр Лукашэнка даручыў максімальна рэалізаваць сельгасарганізацыям назапашаную на складах прампрадпрыемстваў тэхніку. Пра гэта кіраўнік дзяржавы заявіў 24 мая, наведваючы з рабочай паездкай Клічаўскі раён Магілёўскай вобласці.

«Цяпер ёсць магчымасць купіць тэхніку. Учора я прэм’ер-міністру паставіў задачу: неадкладна тэхніку, якая сёння не будзе рэалізаваная на экспарт і знаходзіцца на складах, накіраваць у гаспадаркі.

Кіраўнік дзяржавы лічыць недапушчальным трымаць тэхніку на складах, калі ідуць палявыя работы. «Таму трэба яе неадкладна адправіць у гаспадаркі — „МАЗы“, трактары „МТЗ“, тэхніку „Гомсельмаша“, „Бабруйскаграмаша“ — і падумаць пра ўзаемаразлікі. Самае галоўнае цяпер — аддаць гаспадаркам тэхніку, каб яны яе ўключылі ў абарот», — адзначыў ён.

Асобнае даручэнне Лукашэнка даў па пытанні забеспячэння аграрнікаў азотнымі ўгнаеннямі. «Увесь азот шукайце ў краіне, спыняйце ўсякі экспарт, але я катэгарычна супраць таго, каб траціць валюту на закупку азоту за межамі краіны», — заявіў ён.

Пры гэтым ён запатрабаваў, каб усе вобласці рэспублікі ў роўнай ступені забяспечваліся прадукцыяй прадпрыемства «Гродна Азот». «Некаторыя губернатары паскардзіліся на тое, што „Гродна Азот“ спачатку забяспечвае Гродзенскую вобласць з лішкам, а потым астатніх. Я даручыў разабрацца. Калі гэта так — мала не будзе. У нас усе вобласці роўныя», — папярэдзіў Лукашэнка.

Нагадаем, напярэдадні Аляксандр Лукашэнка, прымаючы з дакладам прэм’ер-міністра Міхаіла Мясніковіча, выказаў занепакоенасць у сувязі з вялікім аб’ёмам складскіх запасаў на некаторых прадпрыемствах. «Сітуацыя, па-мойму, на некаторых прадпрыемствах недапушчальная, хоць яны і кажуць, што гэта сезонны характар і гэтак далей. Мы на гэта яшчэ паглядзім, я ўзяў гэтыя пытанні на кантроль», — заявіў Лукашэнка.

Паводле слоў Лукашэнкі, сітуацыю на рынках збыту нядаўна па яго даручэнні вывучала «група незалежных экспертаў, якія разбіраюцца ў эканоміцы, не з урада, не з прадпрыемстваў».

Лукашэнка таксама даручыў прааналізаваць адпаведную сітуацыю на кожным прадпрыемстве і, зыходзячы з яго эканамічнага стану, пры неабходнасці прадугледзець у тым ліку меры дзяржаўнай падтрымкі ці льгатавання. Плануецца, што пытанні складскіх запасаў і рэалізацыі прадукцыі найбліжэйшым часам стануць прадметам асобнага разгляду на нарадзе ў кіраўніка дзяржавы.

Па стане на 1 мая 2013 года на складах прамысловых прадпрыемстваў Беларусі сабрана гатовай прадукцыі на 33 трлн. 359,4 млрд. рублёў.

Як паведамляе Белстат, аб’ём нерэалізаванай прадукцыі склаў 82,4% сярэднямесячнага аб’ёму вытворчасці, павялічыўшыся за красавік на 2,7% (на 1 мая 2012 года — 49,7%).

• 0
• 0
• 0
• 0
• 0
• 0
• 0
• 0