Лінкявічус: Санкцыі ЕС эфектыўныя і мусяць прымяняцца разам з палітычным дыялогам
Пра гэта заявіў міністр замежных спраў Літвы Лінас Лінкявічус, адкрываючы дыскусію аб эфектыўнасці палітыкі санкцый 18 лістапада ў Бруселі, паведамляе БелаПАН.
«За апошнія дзесяцігоддзі Еўрапейскі саюз ад усеагульнага эмбарга перайшоў да прымянення размераных санкцый, і яны з'яўляюцца толькі адным з інструментаў знешняй палітыкі ЕС.
Мы імкнемся не толькі прымяняць санкцыі, але і падтрымліваць палітычны дыялог, таму што такі двайны падыход звычайна апраўдвае сябе», — прыводзіць прэс-служба МЗС Літвы словы Лінкявічуса.
Літва як старшыня Савета ЕС правяла дэбаты на тэму «Ці дзейнічаюць санкцыі ЕС?» сумесна з інстытутам навуковых даследаванняў European Policy Center.
Было прэзентавана даследаванне чатырох рэжымаў санкцый — у Беларусі, Іране, М'янме і Сірыі.
Лінкявічус адзначыў: «За апошнія два гады значна павялічыўся ўзровень санкцый ЕС. Цяпер яны больш дакладныя, часта скіраваны супраць найбольш важных галінаў.
Мы павінны перагледзець іх уплыў, але ацэнку неабходна аргументаваць вынікамі, а не колькасцю асоб або прадпрыемстваў, якія падлягаюць санкцыям».
Міністр прызнаў, што санкцыі непазбежна будуць уплываць на эканоміку ЕС, але лагічнае іх прымяненне не перашкодзіць росту гандлю з некаторымі краінамі.
Ён заклікаў ЕС да больш цеснай каардынацыі дзеянняў паміж установамі ЕС і дзяржавамі-членамі.
Як адзначае прэс-служба, сярод найбольш частых мер — забарона на экспарт зброі, эканамічныя і фінансавыя абмежаванні, забарона на ўезд на тэрыторыю ЕС, замарожванне сродкаў асоб і прадпрыемстваў на тэрыторыі ЕС.
У дыскусіі ўдзельнічалі каардынатары Дзяржаўнага дэпартамента ЗША Дэн Фрыд і Міністэрства замежных спраў Швецыі Пэр Саланд, прадстаўнікі інстытутаў ЕС і ўстаноў дзяржаў-членаў, няўрадавых арганізацый, дзелавых колаў, СМІ, эксперты.
Савет Еўрасаюза ў канцы кастрычніка працягнуў да 31 кастрычніка 2014 года дзеянне «абмежавальных мер» у дачыненні да ўладаў Беларусі.
Савет ЕС пакінуў у спісе фізічных і юрыдычных асоб, якім забаронены ўезд у ЕС і чые актывы на тэрыторыі супольнасці замарожаны, 232 фізічныя асобы і 25 кампаній і прадпрыемстваў.
Каментары