Дэпутат: За наведванне паліклінікі трэба плаціць хаця б сімвалічна
Пра зарплату дактароў і неабходнасць клапаціцца пра сваё здароўе і плаціць за наведванне паліклінікі разважаў у эфіры праграмы «Контуры» тэлеканала АНТ вечарам 2 лютага дэпутат палаты прадстаўнікоў, член пастаяннай камісіі па ахове здароўя, фізічнай культуры, сямейнай і маладзёжнай палітыцы, старшыня ГА «Беларуская асацыяцыя дактароў» Дзмітрый Шаўцоў.
Паводле яго слоў, галоўная праблема — гэта высокая нагрузка, з якой доктар сутыкаецца штодня. «Вядома, яе трэба нармаваць. І тады сама па сабе праблема будзе часткова вырашана», — лічыць дэпутат.
Наконт выказванняў віцэ-прэм'ера Анатоля Тозіка аб тым, што грамадзяне павінны браць удзел у аплаце свайго лячэння, дэпутат Шаўцоў адзначыў: «Мы няправільна тлумачым фразу «бясплатная медыцына». Яна не бывае бясплатнай. Яна бясплатная для нас з вамі, але для дзяржавы гэта каштуе каласальных грошай. І часам мы марнатраўна ставімся да ўласнага здароўя і па-спажывецку ставімся да сістэмы аховы здароўя. Гэта недапушчальна. Чалавек не павінен даводзіць сябе да сітуацыі, калі ён становіцца жыхаром паліклінікі».
На жаль, паводле слоў Шаўцова, у кожнай паліклініцы знойдзецца досыць вялікая колькасць людзей, якія прыходзяць сюды больш за сто разоў у год. «Проста яны так хочуць. Яны хочуць прыйсці памераць ціск замест таго, каб купіць танометр, проста спытаць, проста пачытаць, інтэрпрэтаваць аналізы, перапытаць, што доктар сказаў на мінулым прыёме. Гэта выліваецца ў досыць сур'ёзную нагрузку.
Што робіцца ў кабінеце ва ўрача? Сядзяць урач, медсястра, пацыент і яшчэ там жа як мінімум два чалавекі «проста спытаць». Такога быць не павінна.
Безумоўна, гэта выліваецца ў раздражняльнасць і пацыента, і ўрача, высокую нагрузку, таму што ўрач не можа засяродзіцца на адной праблеме, паставіць дакладны дыягназ. Гэта гаворыць і пра адсутнасць культуры, павагі да лекара», — канстатаваў спецыяліст.
Пацыент, упэўнены Шаўцоў, павінен быць зацікаўлены ў захаванні ўласнага здароўя: «Калі ён атрымлівае медыцынскую дапамогу бясплатна, то ён марнатраўна і ставіцца да гэтых рэчаў. Калі пацыент будзе хаця б сімвалічна плаціць, ён ужо будзе ўдзельнікам у захаванні ўласнага здароўя, партнёрам», — мяркуе дэпутат.
Парламентарыі, паводле яго слоў, гатовыя да ўнясення адпаведных паправак у заканадаўства, калі патрэбнасць у гэтым узнікне.
Каментары