Памочнік Аляксандра Лукашэнкі, доктар эканамічных навук Кірыл Руды выступіў на старонках «СБ. Беларусь сегодня» з праграмным артыкулам «Беларусь-2030: апераджальнае развіццё».
«Якая мэта ў Беларусі у 2030 годзе?» – задаецца пытаннем Руды. Ён мяркуе, што гнацца за прыростам ВУП і прадукцыйнасцю працы неперспектыўна.
«Ва ўмовах адкрытых межаў, глабальнай эканомікі для краіны ўжо мала заўтра стаць лепшай, чым учора, важней стаць лепшай за іншых. У сувязі з гэтым мэтай стратэгіі можа стаць апераджальнае развіццё.
Але каго даганяць, апярэджваць і з кім параўноўвацца? Гэта маглі б быць бліжэйшыя краіны, якія знаходзяцца ў падобных геаграфічных умовах: Украіна, Польшча, краіны Балтыі, рэгіёны Расіі, якія мяжуюць з Беларуссю, ці іншыя супастаўныя краіны (Венгрыя, Славакія, Чэхія і іншыя)», - адзначае ён.
Якія галіны забяспечаць дасягненне пастаўленай мэты і стануць прыярытэтнымі? На прамысловасць і сельскую гаспадарку Руды не разлічвае: аддача ад інвестыцый у гэтыя сферы падае.
Памочнік Лукашэнкі прапануе чатыры іншыя накірункі развіцця.
На яго думку, на сферу паслуг (будаўніцтва, транспарт, гандаль) вонкавыя шокі ўплываюць не так моцна, што стварае стабільнасць эканамічнага росту ў Беларусі. Разлічвае Руды і на энергетыку, у тым ліку ядзерную. «Вакол будаўніцтва і працы АЭС можа сфармавацца навукова-вытворчы кластар, з’явіцца новае канкурэнтная перавага ў выглядзе новых энергаёмістых вытворчасцяў».
Трэцяе і чацвёртае: перадавыя высокатэхналагічныя галіны і інфармацыйныя тэхналогіі. «Мэтазгодна максімальна выкарыстоўваць традыцыйна моцны нацыянальны патэнцыял у гэтай сферы. Магчыма, варта падумаць над новай роляй Парку высокіх тэхналогій як цэнтра развіцця электроннай эканомікі з удзелам БДУІР, БДУ, НАН. Мяркую, што аказваемая дзяржпадтрымка Парку высокіх тэхналогій павінна даваць адпаведную аддачу краіне ў навуковай (у выглядзе сусветных патэнтаў) і сацыяльна-эканамічнай (рост ўзроўню жыцця і папаўненні бюджэту) сферах», – разважае Кірыл Руды.
Каментары