Асамблея НДА прапаноўвае беларусам вызначыць сімвал, які аб'яднае нацыю
Асамблея няўрадавых дэмакратычных арганізацый (НДА) у межах агульнанацыянальнай кампаніі «Зробім лепш!» абвясціла пра старт праекта, прысвечанага распрацоўцы сімвала, які мог бы аб'яднаць беларусаў.
Пра гэта паведамляе афіцыйны сайт Асамблеі НДА.
Праект рэалізуецца пры інфармацыйнай падтрымцы грамадскага агенцтва «Арт Сядзіба» і беларускай службы «Радыё Свабода».
Як адзначаюць арганізатары праекта, сёння не існуе «магутнага і яркага адзінага знака, які б прыняла большасць беларусаў». «Гэта акалічнасць заахвоціла Асамблею НДА Беларусі, якая аб'ядноўвае больш за 300 няўрадавых дэмакратычных арганізацый і грамадскіх ініцыятыў, звярнуцца да грамадства з пытаннем «Які сімвал аб'ядноўвае беларусаў?», — гаворыцца ў паведамленні.
У межах гэтай грамадска-культурнай акцыі мастакам, дызайнерам, актывістам і проста неабыякавым беларусам прапануецца «разам прыдумаць і вызначыць сучасны наглядны сімвал, які стане знакам аб'яднання беларусаў у праяве сваёй незалежнай пазіцыі, будзе прыняты шырокімі слаямі грамадства».
«Складаная геапалітычная сітуацыя, расійская прапаганда, масавае распаўсюджванне расійскай сімволікі — нельга прадказаць, што будзе неўзабаве з краінай і намі, — адзначаюць аўтары праекта. — Таму наглядны сімвал, які будзе аб'ядноўваць краіну і беларусаў, неабходны».
Як паведамляецца, свае прапановы з нагоды сімвала да 31 жніўня можна адпраўляць на адрас электроннай пошты [email protected] з пазнакай «Сімвал краіны». Будзе абраны найболей прыдатны для аб'яднаўчай ролі сімвал. Яго прэзентацыя адбудзецца 8 верасня, у дзень 500-годдзя бітвы пад Оршай.
Знак-пераможца будзе нанесены на спецыяльна вырабленыя харугвы, якія можна будзе бясплатна замовіць па пошце праз сайт symbal.by ці атрымаць у грамадскіх цэнтрах у шэрагу беларускіх гарадоў.
Арганізатары гэтай акцыі пасля плануюць пусціць гэты знак у «самастойнае шырокае распаўсюджванне па краіне ў розных формах», каб «абраны грамадствам сімвал бліжэйшым часам стаў наяўнай праявай адзінства беларусаў у імкненні да незалежнасці і шырокай нацыянальнай свядомасці».
-
Жанчыну-пульманолага з 30-гадовым стажам адправілі ў калонію па трох палітычных артыкулах
-
Верагоднай прычынай для прыезду Дэрула ў Мінск сталі здымкі для рэкламы катэджаў
-
«Незалежнасць не падае з неба і не даецца назаўсёды. Яе трэба абараняць». Ціханоўская выступіла з заявай да 35-годдзя прыняцця Дэкларацыі аб суверэнітэце
Цяпер чытаюць
Жанчыну-пульманолага з 30-гадовым стажам адправілі ў калонію па трох палітычных артыкулах3
Каментары