Следчы камітэт (СК) Беларусі праводзіць неабходныя следчыя мерапрыемствы на месцы ЦЭЦ, што часткова абрынулася ў Лунінцы (Брэсцкая вобласць). Пра гэта паведаміў начальнік аддзела інфармацыі і сувязяў з грамадскасцю СК Сяргей Кабаковіч.
«У дадзены момант на месцы здарэння працуюць следчыя Ўпраўлення Следчага камітэта па Брэсцкай вобласці, — сказаў ён. — З цэнтральнага апарата СК на месца здарэння выбыла следча-аператыўная група, перасоўная крыміналістычная лабараторыя. У складзе следча-аператыўнай групы прысутнічаюць спецыялісты Дзяржаўнага камітэта судовых экспертыз».
Па словах Кабаковіча, пакуль рана казаць «нават аб папярэдніх версіях таго, што здарылася, што канкрэтна там адбылося».
Як раней паведаміў прэс-сакратар Міністэрства па надзвычайных сітуацыях Віталь Навіцкі,
у 17.06 у МНС паступіла паведамленне аб частковым абрушэнні канструкцый будынка на тэрыторыі будаўніцтва ЦЭЦ па вуліцы Чырвонай у Лунінцы. Загінуў адзін чалавек, адзін шпіталізаваны з траўмамі рознай ступені цяжкасці. Будынак у эксплуатацыю ўведзены не быў.
Між тым, як паведамляе сайт media-polesye.by, выбух быў такой сілы, што яго пачулі ў розных частках горада. Меркавана выбух адбыўся ў электрафільтры. Аднак дакладнай інфармацыі на гэты конт няма, прычына высвятляецца. Адзін работнік, які знаходзіўся побач з электрафільтрам, загінуў на месцы. Двое пацярпелых дастаўлены ў Лунінецкі раённы шпіталь.
Шыбы выляталі не толькі на ЦЭЦ, але і ў бліжэйшых будынках. На месцы аварыі працуюць групы РАНС, РАУС, райаддзела Следчага камітэта і іншых службаў.
Афіцыйнае адкрыццё ЦЭЦ на мясцовых відах паліва планавалася на верасень, праводзіліся выпрабавальныя працы.
Будаўніцтва цеплаэлектрацэнтралі было пачата ў сакавіку 2012 года. Па сведчанні спецыялістаў, 70% абсталявання будучай ЦЭЦ — беларускай вытворчасці, сама турбіна — нямецкай, адзначае сайт media-polesye.by.
Хто з беларусаў трапіў на прыём да прэзідэнта Польшчы ШМАТ ФОТА10
Каментары