Мінбудархітэктуры прапануе ўключыць у генплан Мінска землі ўнутры другой кальцавой аўтадарогі
Міністэрства архітэктуры і будаўніцтва Беларусі прапануе ўключыць у новы генеральны план развіцця Мінска землі ўнутры другой кальцавой аўтадарогі. Аб гэтым заявіў сёння журналістам намеснік міністра Дзмітрый Семянкевіч.
«Горад Мінск пакуль неахвотна ідзе на такую трактоўку развіцця беларускай сталіцы — улады ўсё ж такі бачаць сябе абмежаванымі межамі першай кальцавой аўтадарогі, яны не хочуць бачыць праблемы, якія акружаюць Мінск. Але мы настойліва прапануем уключыць у генплан Мінска землі ўнутры другой кальцавой аўтадарогі», — адзначыў Дзмітрый Семянкевіч.
Намеснік міністра падкрэсліў, што раёны, якія знаходзяцца паміж першай і другой кальцавымі аўтадарогамі, хоць і ствараліся абласнымі структурамі, але іх жыхары ў большасці працуюць на прадпрыемствах Мінска. «Між тым, трэба прызнаць, што сёння па якасці жыцця, па яго насычанасці гэтыя тэрыторыі вельмі моцна адстаюць ад сталіцы. Таму мы настойваем, каб з'явілася адзіная зона, якая будзе прымыкаць да другой кальцавой аўтадарогі, якая была б сур'ёзна разгледжана з пункту гледжання стварэння транспартнай і інжынернай інфраструктур», — канстатаваў ён.
Таксама Дзмітрый Семянкевіч падкрэсліў важнасць захавання зялёных тэрыторый вакол Мінска. «Вядома, можна зразумець вобласць, якая стараецца забудаваць прылеглыя да Мінска землі, таму што яны цудоўна выкупляюцца, гэта добры прыбытак для абласнога бюджэту. Але для Мінска гэта важнейшыя тэрыторыі з пункту гледжання захавання нармальнай экалагічнай сітуацыі ў самім горадзе. Таму Мінск павінен быць зацікаўлены, каб гэтыя зялёныя зоны захаваць», — упэўнены Дзмітрый Семянкевіч.
Цяпер чытаюць
Бабарыка расказаў, чаму перад выбарамі не шукаў падтрымкі ў Расіі. І як яго хацелі звольніць з Белгазпрамбанка за лозунг «Жыве Беларусь!»31
Бабарыка расказаў, чаму перад выбарамі не шукаў падтрымкі ў Расіі. І як яго хацелі звольніць з Белгазпрамбанка за лозунг «Жыве Беларусь!»
Максім Знак пра прэс-канферэнцыю ва Украіне: Мы дамовіліся не ўздымаць найбольш балючыя тэмы — катаванняў, санкцый, вайны. Можа, мусілі мы па-іншаму зрабіць1010
Каментары