Нацбанк плануе выпусціць пяць манет, прысвечаных Скарыну

Нацыянальным банкам Рэспублікі Беларусь зацверджаны Пералік памятных манет, якія плануюцца да выпуску на 2015 год. Такое рашэнне прынята пастановай Праўлення Нацыянальнага банка ад 08.12.2014 № 758, у адпаведнасці з якой у наступным годзе плануецца выпусціць 9 найменняў памятных манет Нацыянальнага банка.

Так, у сувязі са святкаваннем знакавай гістарычнай падзеі – юбілею Перамогі — Нацыянальны банк Рэспублікі Беларусь плануе выпусціць манету «70 гадоў Перамогі савецкага народа ў Вялікай Айчыннай вайне».

Акрамя таго, у наступным годзе ўвесь праваслаўны свет будзе святкаваць 1000-годдзе смерці святога роўнаапостальнага князя Уладзіміра, які 1 жніўня 988 г. прызначыў дзень усенароднага Хрышчэння ў водах Дняпра, дзе і адбылося Таінства святога Хрышчэння. Нацыянальным банкам прадугледжаны выпуск у абарачэнне манет, прысвечаных гэтай памятнай даце.

Серыя памятных манет «Умацаванне і абарона дзяржавы» будзе працягнута выпускам манет «Мікалай Радзівіл Чорны», 500-годдзе з дня нараджэння якога будзе адзначацца ў 2015 годзе.

Напярэдадні 2016 года ў працяг серыі «Кітайскі каляндар» будзе выпушчана памятная манета «Год Малпы». Таксама будзе працягнута серыя памятных манет «Задыякальны гараскоп» выпускам памятных манет, прысвечаных знакам задыяка: «Шалі (Libra)», «Скарпіён (Scorpio)», «Стралец (Sagittarius)», «Рак (Cancer)», «Леў (Leo)», «Дзева (Virgo)».

З улікам папулярнасці беларускага балета і цікавасці, якая праяўляецца да гэтай тэматыцы з боку як нашых грамадзян, так і замежных нумізматаў, у Пералiк на 2015 год уключаны памятныя манеты «Беларускі балет. 2015».

Стала ўжо традыцыяй выпускаць памятныя манеты, прысвечаныя Птушцы года, якую вызначае грамадскае аб’яднанне «Ахова птушак Бацькаўшчыны». У 2015 годзе такой птушкай будзе «Вушатая сава».

Напярэдадні 500-годдзя выхаду Бібліі Францыска Скарыны Нацыянальны банк пачынае выпуск памятных манет серыі «Шлях Скарыны».

У 2015 годзе будуць выпушчаны ў абарачэнне дзве манеты: «Шлях Скарыны. Полацк» і «Шлях Скарыны. Кракаў». Усяго ж у рамках гэтай серыі ў 2015–2017 гг. плануецца выпусціць 5 манет з адлюстраваннем гарадоў, у якіх жыў і працаваў Францыск Скарына (Полацк, Кракаў, Падуя, Вільня і Прага).

З 1 студзеня 2015 г. у адпаведнасці з дагаворам, падпісаным прэзідэнтамі Рэспублікі Беларусь, Рэспублікі Казахстан і Расійскай Федэрацыі 29 мая 2014 г. у г. Астане, пачынае функцыянаваць Еўразійскі эканамічны саюз (ЕАЭС). Зыходзячы з гістарычнай значнасці гэтай падзеі, у снежні 2015 г. усімі краінамі – удзельніцамі ЕАЭС плануецца сінхронны выпуск памятных манет, прысвечаных утварэнню Еўразійскага эканамічнага саюза.

• 0
• 0
• 0
• 0
• 0
• 0
• 0
• 0