У 2015 годзе ў Нацыянальным аэрапорце Мінск пачнецца будаўніцтва другой узлётна-пасадачнай паласы, заявіў 30 снежня віцэ-прэм'ер Анатоль Калінін падчас наведвання аэрапорта, дзе завяршылася рэканструкцыя другога пускавога комплексу.
«Гэта будзе падрыхтоўчы перыяд. На працягу двух гадоў паласа будзе пабудаваная», — цытуе намесніка прэм'ер-міністра прэс-служба ўрада.
«З адкрыццём другога пускавога комплексу мы завяршылі рэканструкцыю аэравакзала Нацыянальнага аэрапорта Мінск, у выніку якой дадаткова пабудавана больш за 2 тыс. кв. м плошчаў, створаны больш камфортныя ўмовы для пасажыраў, для аператыўнага кантролю пагранічнікаў і мытных службаў», — сказаў віцэ-прэм'ер. Ён звярнуў увагу на тое, што колькасць кабін пагранічнага кантролю павялічана ў 2,5 разу.
На рэалізацыю праекта зрасходавана 720 млрд рублёў. Калінін адзначыў, што тэрміны праекта былі скарочаныя больш чым у два разы ад запланаванага. «Замоўца і беларускія будаўнікі выканалі свае абавязацельствы і дасягнулі выніку, які задаволіць самых патрабавальных пасажыраў», — канстатаваў намеснік прэм'ер-міністра.
Калінін таксама паведаміў, што аб'ём пасажыраў у Нацыянальным аэрапорце Мінск можа дасягнуць у наступнай пяцігодцы 5,8 млн чалавек у год.
«Мы выйшлі на прапускную здольнасць у 5,8 млн чалавек у год з завяршэннем рэканструкцыі аэравакзала. Я думаю, што такога аб'ёму пасажыраў мы дасягнем у наступнай пяцігодцы», — сказаў віцэ-прэм'ер. Для гэтага, паводле яго меркавання, неабходна закупіць каля пяці паветраных суднаў. «Кожны набыты самалёт дае нам як мінімум 10% прыбаўкі ў аказанні адпаведных паслуг», — растлумачыў Калінін.
Цяпер чытаюць
Стала вядома, дзе працуе фаварытка Лукашэнкі Уладлена Зайцава1
Каментары