У Мінску 9 мая адбудзецца каля 70 святочных культурных і спартыўных мерапрыемстваў

У Мінску 9 мая адбудзецца каля 70 святочных культурных і спартыўных мерапрыемстваў. Пра гэта на прэс-канферэнцыі 28 красавіка ў прэс-цэнтры дзяржаўнага інфармацыйнага агенцтва БелТА паведаміў намеснік начальніка галоўнага ўпраўлення ідэалагічнай работы, культуры і па справах моладзі Мінгарвыканкама Сяргей Мядзведзеў. 

Паводле яго слоў, асноўная гарадская пляцоўка традыцыйна будзе размешчана на праспекце Пераможцаў у раёне Палаца спорту, дзе пройдзе канцэртная праграма «Квітнеючы май». Адбудзецца святочны канцэрт вядучых творчых калектываў і выканаўцаў, выстава-кірмаш майстроў народнай творчасці «Горад майстроў», святочны кірмаш. Час правядзення з 10.00 да 23.00. 

30 красавіка ў Нацыянальным выставачным цэнтры «БелЭкспа» адбудзецца «Баль Пераможцаў» для ветэранаў Вялікай Айчыннай вайны. «У ім возьмуць удзел каля 500 ветэранаў, будзе дадзены святочны канцэрт з удзелам вядучых артыстаў беларускай эстрады, накрыты сталы з пачастункамі», — паведаміў Мядзведзеў. 

У Беларускім дзяржаўным акадэмічным музычным тэатры 5 мая адбудзецца паказ спектакля «Белыя жураўлі» ў пастаноўцы сербскага рэжысёра Іваны Жыгон. 

9 мая на тэрыторыі Верхняга горада будзе праходзіць канцэртная праграма «Кветкі Перамогі» ў межах летняга музычна-турыстычнага сезона, які адкрываецца 2 мая. Па выхадных гэтая зона будзе свабоднай ад аўтамабіляў, тут будуць праходзіць канцэрты, выступленні вулічных музыкантаў, тэатраў. 

9 мая ў парку Перамогі на сцэне каля галоўнага ўваходу пройдзе культурна-грамадская акцыя з удзелам пераможцаў і дыпламантаў Мінскага гарадскога агляду-конкурсу патрыятычнай песні (пачатак у 17.00). 

Ва ўсіх раёнах Мінска будуць арганізаваны канцэртныя праграмы, прысвечаныя Дню Перамогі. Больш падрабязна аб святочных мерапрыемствах у сталіцы можна даведацца на сайце Мінгарвыканкама. 

Паводле слоў намесніка начальніка ўпраўлення спорту і турызму Мінгарвыканкама Святланы Дзямешкі, падчас святаў адбудзецца больш чым 100 спартыўных мерапрыемстваў, у якіх возьме ўдзел каля 7 тыс. чалавек. 

Сярод значных мерапрыемстваў яна назвала міжнародны турнір па сілавым экстрыме 9 мая каля Палаца спорту, кубак Перамогі па грэка-рымскай барацьбе 9 мая ў Гарадскім цэнтры барацьбы імя Мядзведзя, «Зорны паход» па маршрутах Мінск — Курган Славы, Мінск — Хатынь (9—10 мая). 

8 мая адбудзецца Усебеларускі лёгкаатлетычны крос на зялёнай зоне каля стэлы «Мінск — горад-герой», у якім плануецца ўдзел да 4 тыс. чалавек. «Забегі будуць для розных узроставых груп, карпаратыўныя, ветэранаў, навучэнцаў і іншыя», — адзначыла Дзямешка. Паводле яе слоў, спартыўна-масавыя мерапрыемствы пройдуць ва ўсіх раёнах горада.

• 0
• 0
• 0
• 0
• 0
• 0
• 0
• 0