У Брэсце мастачка ўпрыгожыла малюнкамі люкі каля дзіцячых пляцовак ФОТА
Брэсцкая мастачка Іна Болундзь размалявала каналізацыйныя люкі каля дзіцячых пляцовак у Брэсце ў рамках аўтарскага стрыт-арт-праекта.
Творчая ініцыятыва берасцейкі ўвасобілася ў жыццё дзякуючы конкурсу на стварэнне гарадскіх інсталяцый і малых архітэктурных формаў, які праводзіўся пад эгідай агенцтва рэгіянальнага развіцця «Дзедзіч». З дасланых прац журы адабрала дзясятку лепшых для наступнага іх увасаблення на вуліцах горада.
Праект «Вясёлыя люкі» — першы, які быў рэалізаваны. Яго аўтарка, мастачка Іна Болундзь, распавяла, што ідэю яна знайшла ў інтэрнэце.
«Я прапаноўвала не толькі люкі, але з таго, што ўхвалілі, засталіся толькі яны», — патлумачыла яна.
Пасля ўхвалення мастачка пачала працу. Паводле ўмоў неабходна было да 1 жніўня размаляваць не больш за 20 каналізацыйных люкаў паблізу дзіцячых пляцовак горада.
«Мы працавалі ў асноўным у новабудоўлях, таму што ў цэнтры люкі раскіданыя, а ў мікрараёнах яны групкамі былі», — патлумачыла аўтар ідэі.
На гэтым пакуль праект завяршаецца. Аднак Іна тлумачыць, што з задавальненнем яго б працягнула: «Гэта ўжо не ад мяне залежыць, а ад аддзела архітэктуры і горадабудаўніцтва. Калі прапануюць, я абедзвюма рукамі за».
Цяпер чытаюць
Модная мінская кавярня «Маркс» трапіла ў скандал: адтуль папрасілі сысці жанчыну, якая малявала. Але ўсё не так адназначна17
Каментары