Былы палітвязень Малчанаў ваюе ў АТА. «Я не мог спакойна сядзець, калі Расія напала на Украіну»
27-гадовы Аляксандр Малчанаў днямі паведаміў у фэйсбуку, што з’ехаў ва Украіну. «Адправіцца за краты толькі за тое, што злёгку дапамагаў украінцам ў барацьбе за тэрытарыяльную цэласнасць сваёй краіны ў мяне жадання няма — я дастаткова часу правёў у беларускіх турмах, зарабіў там кучу болек», — напісаў Аляксандр.
Мы патэлефанавалі хлопцу ў Кіеў, каб ён апавёў пра сваё знаходжанне ў зоне АТА. «Я з’ехаў на фронт восенню мінулага года. Паехаў бы раней, калі адбылася акупацыя Крыма, але быў у Беларусі пад прэвентыўным надглядам. Пасля яшчэ крыху паправіў здароўе ў санаторыі».
«Мне ніколі не была абыякавай Украіна, — кажа Аляксандр. – Падабаюцца мясцовыя людзі, прырода, мне тут камфортна. Калі Расія напала на Украіну, то я не мог спакойна глядзець на гэта. Калі нешта падобнае, не дай Бог, здарыцца ў Беларусі, то я буду першым таксама бараніць нашу краіну».
Аляксандр не служыў у войску, таму шчыра прызнаецца, што час у вучэбцы аднаго з батальёнаў быў не самым простым. «Найперш фізічныя практыкаванні, ніякага ідэалагічнага маразму не было. На фронце прасцей. Па спецыяльнасці я стралок».
На дадзены момант Малчанаў знаходзіцца ў Кіеве, у зону АТА ён плануе вярнуцца праз два тыдні. Пакуль хлопец не раскрывае батальён, у якім ён служыць, а таксама вайсковыя аперацыі, у якіх прымаў удзел. «Праз пару тыдняў усё агучу», — кажа ён.
Аляксандр Малчанаў родам з Барысава, як і славутая снайперка Наталля Красоўская, што ваявала на баку баевікоў. «Не, я з ёй не сутыкаўся. Ні ў Барысаве, ні ў АТА. Забаўна было б яе тут сустрэць… У Барысаве ёсць далёкія знаёмыя, якія кажуць, што яна наркаманка».
Не так даўно Аляксандру ўдалося купіць кватэру ў Кіеве, у доме, які будуецца. «Грошай хапіла толькі на саму кватэру, дзе буду браць на тое, каб яе абсталяваць, зрабіць аддзелачныя працы, пакуль не ведаю».
У Беларусь вяртацца Аляксандр пакуль не плануе. «КДБшнікі цікавіліся ў маіх знаёмых, сяброў, ці праўда, што я ў зоне АТА, хацелі прышыць мне «наёмніцтва», але доказаў не хапае». Апошні раз у Беларусі ён быў у маі.
Аляксандр Малчанаў быў тым, хто 19 снежня 2010 года сарваў чырвона-зялёны сцяг з будынка КДБ і ўсталяваў бел-чырвона-белы. Пазней ён быў асуджаны да трох гадоў зняволення, вызвалены ў верасні 2011 рашэннем Аляксандра Лукашэнкі.
Вядома, што на баку Украіны ваююць яшчэ два былых беларускіх палітвязні – Васіль Парфянкоў і Эдуард Лобаў.
Цяпер чытаюць
Кіберпартызаны і хакеры Silent Crow узламалі «Аэрафлот» і знішчылі яго ІТ-інфраструктуру. У расійскіх аэрапортах — хаос22
Кіберпартызаны і хакеры Silent Crow узламалі «Аэрафлот» і знішчылі яго ІТ-інфраструктуру. У расійскіх аэрапортах — хаос
«Людзі, будзьце пільныя! У такой сітуацыі можа апынуцца кожны жыхар ЕС!» Грамадзянін Літвы, асуджаны ў Беларусі да 13 гадоў за «шпіянаж», перадаў ліст з калоніі3939
«Людзі, будзьце пільныя! У такой сітуацыі можа апынуцца кожны жыхар ЕС!» Грамадзянін Літвы, асуджаны ў Беларусі да 13 гадоў за «шпіянаж», перадаў ліст з калоніі39
«Незалежнасць не падае з неба і не даецца назаўсёды. Яе трэба абараняць». Ціханоўская выступіла з заявай да 35-годдзя прыняцця Дэкларацыі аб суверэнітэце5050
Каментары