Аляксандр Лукашэнка атрымаў 68,1% галасоў на ўчастку № 48 Цэнтральнага раёна Мінска, дзе 7 кастрычніка датэрмінова прагаласавала старшыня Цэнтральнай камісіі па выбарах і правядзенні рэспубліканскіх рэферэндумаў Лідзія Ярмошына.
За афіцыйнага лідар прагаласавалі 475 з 698 выбаршчыкаў, якія атрымалі бюлетэні.
У Таццяны Караткевіч 5,2% галасоў (36), у Сяргея Гайдукевіча — 3,2% (22), у Мікалая Улаховіча — 2,3% (16). Супраць усіх прагаласавала 15,1% грамадзян (139).
Яўка выбаршчыкаў склала 75,9% (усяго на ўчастку зарэгістравана 920 выбаршчыкаў). Датэрмінова прагаласавала 39,3% грамадзян (362), у асноўны дзень — 36,5% (336).
На гэтым участку ў офісным цэнтры «Пакроўскі» насупраць «Мінск-Арэны» галасуюць міністры і іншыя чыноўнікі, якія жывуць у Драздах і Веснінцы. Выбарчую камісію ўзначальвае былы дэпутат Палаты прадстаўнікоў Мікалай Сергіенка.
На ўчастку было дзесяць назіральнікаў — з сярэдняй школы № 32, Беларускага саюза жанчын, Федэрацыі прафсаюзаў, «Мінск-Арэны», Беларускага саюза ветэранаў, Беларускай сацыяльна-спартыўнай партыі. Ні адной прэтэнзіі да ходу галасавання яны не выказалі. Тры назіральнікі сышлі да абвяшчэння вынікаў выбараў. Урны на ўчастку былі празрыстыя.
Бацькам з дзецьмі намеснік старшыні камісіі Уладзімір Марковіч раздаваў цукеркі і дысконтныя карты магазіна «Суседзі». На ўчастку даў канцэрт калектыў дэпартамента аховы МУС.
Каментары