Чырвоны Крыж арганізаваў мабільныя пункты з гарачым чаем ва ўсёй краіне
З пачатку студзеня Беларускае таварыства Чырвонага Крыжа пачало аперацыю «Зіма-2016» па аказанні дапамогі насельніцтву ва ўмовах моцнага марозу.
Як расказаў спецыяліст па падрыхтоўцы рэагавання на надзвычайныя сітуацыі БТЧК Дзмітрый Русакоў, у межах аперацыі ў абласных гарадах Беларусі ўстаноўленыя больш за 100 палатак абагрэву для насельніцтва, дзе можна сагрэцца гарачай гарбатай і атрымаць інфармацыю аб правілах паводзін пры нізкіх тэмпературах. «Палаткі ўстаноўленыя ў месцах вялікай колькасці людзей — гэта цэнтральныя плошчы, прыпынкі грамадскага транспарту, дзе людзі вымушаныя доўгі час чакаць транспарту», — зазначыў ён.
Таксама будуць арганізаваныя рэйды па гарадскіх сметніках для аказання дапамогі бяздомным. У прыватнасці, 5 студзеня рэйды пройдуць у Мінску, Гомелі і Віцебску. Бяздомным будзе аказаная першая медыцынская дапамога, прапанаваная гарачая ежа і цёплыя рэчы.
Акрамя таго, чатыры аўтамабілі працуюць на трасах і аказваюць дапамогу кіроўцам. «Яны працуюць на розных напрамках. Мы працуем з аўтааматарамі, у якіх ёсць радыёсувязь, — яны нам паведамляюць аб замерзлых аўтамабілях, і мы ім аказваем дапамогу. Нашы нумары ёсць у МНС і ДАІ, калі патрабуецца дапамога, яны нам тэлефануюць і накіроўваюць наш транспарт», — расказаў спецыяліст.
Паводле звестак Гідрамета, марознае надвор`е захаваецца ў Беларусі большую частку гэтага тыдня, уключаючы Раство. У аўторак мінімальная тэмпература паветра ноччу чакаецца мінус 14—20°С, пры праясненнях мінус 21—24°С; максімальная днём мінус 8—14°С, у асобных раёнах мінус 15—17°С. Мяркуецца, што тэмпература пачне павышацца з суботы.
Каментары