6 сакавіка ва ўзросце 94 гадоў памерла Нэнсі Рэйган, удава 40-га прэзідэнта ЗША Рональда Рэйгана.
Прычына смерці пакуль не абвешчаная, але вядома, што ў апошнія гады яна некалькі разоў падала, атрымліваючы розныя траўмы. Так у 2012 годзе яна ўпала ў сваім доме ў Лос-Анджэлесе і зламала некалькі рэбраў.
«Маё жыццё па-сапраўднаму пачалося, калі я выйшла замуж, — казала Нэнсі Рэйган, якая правяла ў шлюбе 52 гады. — Дзякуй Богу, што мы знайшлі адзін аднаго. Я не ўяўляю жыццё без яго».
Нэнсі — дачка прадаўца аўтамабіляў і актрысы. Яна таксама стала актрысай. Упершыню з Рональдам Рэйганам яны сустрэліся ў 1951 годзе, а ў 1952-м - пажаніліся. Яна здымалася да 1956 года.
У прамежку з 1981-га па 1989 год Нэнсі Рэйган заўсёды ўваходзіла ў спіс жанчын, якімі захапляюцца больш за ўсё ў свеце па апытанні Gallup. Тройчы яна была ў гэтым спісе першай.
Рональд Рэйган быў прэзідэнтам ЗША з 1981-га па 1989 год. Ён памёр у 2004 годзе.
Каментары