Раздачы пустых грошай больш не будзе, заявіў прэм'ер-міністр Андрэй Кабякоў, прадстаўляючы 5 красавіка ў парламенце праграму дзейнасці ўрада Беларусі на перыяд да 2020 года.
«Пустыя грошы раздавацца не будуць. Крэдытавацца будуць толькі эфектыўныя праекты, і каб прэтэндаваць на дзяржпадтрымку, неабходна будзе спачатку самым жорсткім чынам аптымізаваць выдаткі», — сказаў прэм'ер.
Ён падкрэсліў, што значныя аб'ёмы дзяржпадтрымкі ў мінулыя гады прывялі да зніжэння эфектыўнасці выдзеленых рэсурсаў. «Мы ўбачылі такую заканамернасць: чым больш грошай выдзяляецца эканоміцы, тым ніжэйшы каэфіцыент манетызацыі», — канстатаваў Кабякоў.
У ліку негатыўных наступстваў масавай выдачы дырэктыўных крэдытаў кіраўнік урада прывёў дэвальвацыю і інфляцыю. Каб пазбегнуць такіх наступстваў, дзяржпадтрымка павінна аказвацца толькі пад эфектыўныя праекты, дадаў Кабякоў.
«Нашы суб'екты гаспадарання павінны эфектыўна функцыянаваць, а не чакаць падтрымкі з боку дзяржавы. А мы прывыклі нічога не мяняць і казаць «дайце грошай». Такога больш не будзе», — падкрэсліў прэм'ер-міністр.
У сувязі з гэтым ён нагадаў, што ўказ № 78 аб мерах па павышэнні эфектыўнасці развіцця сацыяльна-эканамічнага комплексу прадугледжвае скарачэнне прадпрыемствамі сабекошту прадукцыі і паслуг на 25%.
«Калі распрануцца па пояс, як сказаў прэзідэнт, згоняць тлушч, яшчэ і яшчэ раз скароцяць выдаткі, тады і будзе разглядацца пытанне, ці варта аказваць такім прадпрыемствам дзяржпадтрымку», — рэзюмаваў Кабякоў.
Бульба-фітнэс: беларусы паказваюць у сацыяльных сетках, колькі бульбы выкапалі сёлета5
Каментары