Украінцаў Генадзя Афанасьева і Юрыя Салошанку, якія былі асуджаныя расійскім судом, абмянялі на адэскіх арганізатараў і ўдзельнікаў так званай «Народнай рады Бесарабіі» Алену Глішчынскую і Віталя Дзідзенку.
Пра гэта піша адэскае выданне «Думская» са спасылкай на свае крыніцы.
«Глішчынскую і Дзідзенку абвінавачваюць у сепаратызме — яны былі ў ліку арганізатараў і актыўных удзельнікаў так званай «Народнай рады Бесарабіі», — піша выданне.
«У сакавіку-красавіку былі праведзеныя арышты, сярод затрыманых былі журналісты Арцём Бузіла, Віталь Дзідзенка і Алена Глішчынская. Пасля Бузіла быў прысуджаны да чатырох гадоў абмежавання волі, праз год выйшаў на волю па «законе Саўчанка» і адразу ж пакінуў Украіну. Глішчынская і Дзідзенка адправяцца ў Расію сёння», — адзначаецца ў паведамленні.
Дырэктара тэлекампаніі «Новая хваля» Алену Глішчынскую арыштавалі супрацоўнікі СБУ ў красавіку 2015 года. Паўтара месяца таму ў СІЗА ў яе нарадзіўся сын. Акрамя таго, у яе ёсць яшчэ двое непаўналетніх дзяцей.
Дзідзенка — галоўны рэдактар парталу «Інфацэнтр». Суд прысудзіў яго да трох гадоў абмежавання волі, цяпер справа знаходзіцца ў апеляцыі.
Як паведаміў «Укрінфарм», самалёт з Афанасьевым і Салошанкам ужо прызямліўся ў аэрапорце «Барыспаль». Абодва незаконна асуджаныя ўкраінцы будуць сустракацца з прэзідэнтам Украіны Пятром Парашэнкам.
Як піша РІАН, самалёт авіякампаніі ДМК «Расія» даставіў Глішчынскую і Дзідзенку ў Маскву. Як паведамілі ў адміністрацыі прэзідэнта РФ, пасярэднікам пры іх вызваленні стаў член падгрупы па гуманітарных пытаннях у трохбаковай кантактнай групе, кум прэзідэнта РФ Пуціна Віктар Медвядчук.
Каментары