Член аднаго з участковых выбаркамаў у Мінску здала сваё пасведчанне пасля спробы расказаць журналістам пра фальсіфікацыі з яўкай, сутыкнуўшыся з супраціўленнем з боку кіраўніка камісіі.
Прадстаўнік выбарчай камісіі ўчастка № 425 103-га Дамброўскай выбарчай акругі Ядвіга Угольнік, якая падтрымлівае аргкамітэт па стварэнні партыі «Беларуская хрысціянская дэмакратыя», мела намер паведаміць аб меркаваных фактах махінацый з яўкай. Журналісты днём 11 верасня прыйшлі на яе ўчастак паводле запрашэння сустаршыні БХД Віталя Рымашэўскага.
З'яўленне Рымашэўскага і кандыдата ад БХД па акрузе Вольгі Кавальковай у суправаджэнні прэсы выклікала рэзкую негатыўную рэакцыю з боку старшыні камісіі, дырэктара школы № 159, на тэрыторыі якой размешчаны ўчастак, і праўладных, мяркуючы па ўсім, назіральнікаў. Асабліва вострай была рэакцыя на прадстаўнікоў СМІ. Старшыня камісіі Іна Богдан запатрабавала ад дзяжурнага міліцыянера вывесці тых, хто прыйшоў, аднак далей за сітуацыяй сталі назіраць некалькі сілавікоў у цывільным, якія сачылі за Рымашэўскім з Кавальковай яшчэ да таго, як яны зайшлі ўнутр школы. Адзін з сілавікоў здымаў на відэакамеру.
Рымашэўскі прапанаваў Угольнік выйсці са школы і паведаміць пра фальсіфікацыі на ўчастку прэсе, але ў адказ на гэта старшыня камісіі сказала ёй, што яна ў такім выпадку «як выйдзе, так і пойдзе». Нягледзячы на супраціўленне з боку кіраўніцтва камісіі, Угольнік, седзячы на сваім месцы, паведаміла журналістам, што на ўчастку на справе назіраюцца праблемы з яўкай, а старшыня камісіі «перажывае за яўку», адсюль, на яе думку, і ўзнікае патрэба ў яе завышэнні.
«Вось яна сказала, таму што нічога не ведае і не разумее. Сказаць лёгка, а як цяпер ёй выкруціцца? Няхай дакажа, — адказала старшыня камісіі. — Ну, калі яна сядзіць, баба, якая нічога не разумее, прабачце мне…»
Пасля гэтых слоў Угольнік здала пасведчанне члена камісіі і пакінула памяшканне школы. Журналістам яна заявіла, што, паводле яе назіранняў, дакладны падлік яўкі на ўчастку не вядзецца.
«Я нешта пералічвала, але не ўсе. Аднак візуальна відаць, што там няма 568 чалавек, якія прыйшлі, а толькі прыблізна 200», — адзначыла яна.
Паводле слоў назіральніка ад БСДП (Грамада) Генадзя Быкава, які выйшаў да прэсы, яўка на ўчастку падчас датэрміновага галасавання завышаная больш як у два разы. Згодна з падлікамі назіральніка, за ўвесь час датэрміновага галасавання бюлетэні тут атрымалі 279 чалавек, а ў пратаколе ўчастковай камісіі фігуруе лічба 568.
Пасля інцыдэнту прадстаўнікі аргкамітэта БХД склалі скаргу ў пракуратуру ў сувязі з зафіксаваным, як яны сцвярджаюць, фактам завышэння яўкі выбаршчыкаў на ўчастку.
На разыходжанні ў афіцыйных звестках і ва ўласных падліках аб яўцы ў перыяд датэрміновага галасавання з самага яго пачатку заяўляюць незалежныя назіральнікі на парламенцкіх выбарах.
Цяпер чытаюць
«Засяроджуся на працы з ЗША». Ціханоўскі расказаў пра свае палітычныя планы на 2026 год42
Каментары