Člen adnaho z učastkovych vybarkamaŭ u Minsku zdała svajo paśviedčańnie paśla sproby raskazać žurnalistam pra falsifikacyi ź jaŭkaj, sutyknuŭšysia z supraciŭleńniem z boku kiraŭnika kamisii.
Pradstaŭnik vybarčaj kamisii ŭčastka № 425 103-ha Dambroŭskaj vybarčaj akruhi Jadviha Uholnik, jakaja padtrymlivaje arhkamitet pa stvareńni partyi «Biełaruskaja chryścijanskaja demakratyja», mieła namier paviedamić ab mierkavanych faktach machinacyj ź jaŭkaj. Žurnalisty dniom 11 vieraśnia pryjšli na jaje ŭčastak pavodle zaprašeńnia sustaršyni BCHD Vitala Rymašeŭskaha.
Źjaŭleńnie Rymašeŭskaha i kandydata ad BCHD pa akruzie Volhi Kavalkovaj u supravadžeńni presy vyklikała rezkuju niehatyŭnuju reakcyju z boku staršyni kamisii, dyrektara škoły № 159, na terytoryi jakoj raźmieščany ŭčastak, i praŭładnych, miarkujučy pa ŭsim, naziralnikaŭ. Asabliva vostraj była reakcyja na pradstaŭnikoŭ ŚMI. Staršynia kamisii Ina Bohdan zapatrabavała ad dziažurnaha milicyjaniera vyvieści tych, chto pryjšoŭ, adnak dalej za situacyjaj stali nazirać niekalki siłavikoŭ u cyvilnym, jakija sačyli za Rymašeŭskim z Kavalkovaj jašče da taho, jak jany zajšli ŭnutr škoły. Adzin ź siłavikoŭ zdymaŭ na videakamieru.
Rymašeŭski prapanavaŭ Uholnik vyjści sa škoły i paviedamić pra falsifikacyi na ŭčastku presie, ale ŭ adkaz na heta staršynia kamisii skazała joj, što jana ŭ takim vypadku «jak vyjdzie, tak i pojdzie». Niahledziačy na supraciŭleńnie z boku kiraŭnictva kamisii, Uholnik, siedziačy na svaim miescy, paviedamiła žurnalistam, što na ŭčastku na spravie nazirajucca prablemy ź jaŭkaj, a staršynia kamisii «pieražyvaje za jaŭku», adsiul, na jaje dumku, i ŭźnikaje patreba ŭ jaje zavyšeńni.
«Voś jana skazała, tamu što ničoha nie viedaje i nie razumieje. Skazać lohka, a jak ciapier joj vykrucicca? Niachaj dakaža, — adkazała staršynia kamisii. — Nu, kali jana siadzić, baba, jakaja ničoha nie razumieje, prabačcie mnie…»
Paśla hetych słoŭ Uholnik zdała paśviedčańnie člena kamisii i pakinuła pamiaškańnie škoły. Žurnalistam jana zajaviła, što, pavodle jaje nazirańniaŭ, dakładny padlik jaŭki na ŭčastku nie viadziecca.
«Ja niešta pieraličvała, ale nie ŭsie. Adnak vizualna vidać, što tam niama 568 čałaviek, jakija pryjšli, a tolki pryblizna 200», — adznačyła jana.
Pavodle słoŭ naziralnika ad BSDP (Hramada) Hienadzia Bykava, jaki vyjšaŭ da presy, jaŭka na ŭčastku padčas daterminovaha hałasavańnia zavyšanaja bolš jak u dva razy. Zhodna z padlikami naziralnika, za ŭvieś čas daterminovaha hałasavańnia biuleteni tut atrymali 279 čałaviek, a ŭ pratakole ŭčastkovaj kamisii fihuruje ličba 568.
Paśla incydentu pradstaŭniki arhkamiteta BCHD skłali skarhu ŭ prakuraturu ŭ suviazi z zafiksavanym, jak jany śćviardžajuć, faktam zavyšeńnia jaŭki vybarščykaŭ na ŭčastku.
Na razychodžańni ŭ aficyjnych źviestkach i va ŭłasnych padlikach ab jaŭcy ŭ pieryjad daterminovaha hałasavańnia z samaha jaho pačatku zajaŭlajuć niezaležnyja naziralniki na parłamienckich vybarach.
Ciapier čytajuć
Halina Dzierbyš kazała prakuroru: «Jak pamru, budu da ŭsich vas nočču prychodzić». I žyćcio ŭžo dahnała jaje sudździu i śviedak. Historyja piensijanierki, jakoj dali 20 hadoŭ kałonii1414
Kamientary