Суд Маладзечанскага раёна прысудзіў былога намесніка старшыні Валожынскага райвыканкама Іосіфа Ляшкевіча да васьмі гадоў пазбаўлення волі за карупцыйныя злачынствы.
Чыноўнік быў затрыманы год таму. Як паведамлялі раней у МУС, ён дапамог асвоіць каля 2 млрд рублёў (недэнамінаваных), якія з бюджэту былі выдзеленыя на рэканструкцыю і будаўніцтва сацыяльных аб'ектаў. Грошы пералічылі прыватнаму прадпрыемству, за гэта Ляшкевіч атрымаў 40 квадратных метраў паркету, які праваахоўнікі ацанілі ў 10 млн рублёў. У выніку незаконнай здзелкі сарваўся тэрмін здачы шматкватэрнага дома. Падрадчык аказаўся нядобрасумленным, акты аб выкананых работах былі фіктыўныя.
Як паведамляе Мінскі абласны суд, Іосіф Ляшкевіч прызнаны вінаватым у перавышэнні ўлады і службовых паўнамоцтваў (ч. 3 арт. 426 КК), а таксама ў атрыманні хабару (ч. 3 арт. 430 КК). У выніку суд прызначыў яму пакаранне ў выглядзе васьмі гадоў пазбаўлення волі ў калоніі ўзмоцненага рэжыму з канфіскацыяй маёмасці.
Асаблівасць гэтай крымінальнай справы ў тым, што судовае следства было адноўлена пасля таго, як суддзя пайшла ў дарадчы пакой для вынясення прыгавору. Справа разглядалася пад старшынствам суддзі Інесы Южык.
Прысуд не набыў моц, абвінавачваны мае намер абскардзіць яго ў Мінскім абласным судзе.
Цяпер чытаюць
Модная мінская кавярня «Маркс» трапіла ў скандал: адтуль папрасілі сысці жанчыну, якая малявала. Але ўсё не так адназначна15
Каментары