Агульная працягласьць платных участкаў складзе каля 2,5— 3 тысяч кілямэтраў. У іх ліку, да прыкладу, могуць апынуцца ўчасткі аўтамабільнай дарогі ў кірунку Полацк — Віцебск і далей у Расею.
Колькасьць платных аўтамабільных дарог у Беларусі можа павялічыцца, паведаміў сёньня на прэсавай канфэрэнцыі начальнік аддзелу разьвіцьця дарожнай сеткі дэпартамэнту «Белаўтадар» Уладзімер Мардзіловіч.
Зь ягоных слоў, разглядаецца пытаньне пра магчымасьць спаганяньня з аўтамабілістаў платы за праезд па некаторых участках асноўных транзытных аўтамабільных дарог. Агульная працягласьць такіх участкаў складзе каля 2,5— 3 тысяч кілямэтраў.
«У іх ліку, да прыкладу, могуць апынуцца ўчасткі аўтамабільнай дарогі ў кірунку Полацк — Віцебск і далей у Расею», праінфармаваў спэцыяліст.
«Белаўтадар скончыў афармленьне тэхніка‑эканамічнага абгрунтаваньня гэтага магчымага новаўвядзеньня. Найбліжэйшым часам яно будзе накіравана на разгляд ва ўрад. У ім выкладзены пэрспэктывы магчымага ўвядзеньня платы, а таксама мэханізм яе спагнаньня.
«Такія мэханізмы, да прыкладу, дзейнічаюць у Нямеччыне й Чэхіі, аднак мэтодыка збору платы ў гэтых краінах розная, — сказаў Уладзімер Мардзіловіч. — Мы ўважліва вывучым яе».
«Хутчэй за ўсе, аўтамабілі павінны будуць праяжджаць цераз спэцыяльныя ўстаноўкі зь лічыльнікамі, а працэс пропуску іх на платны аўтаўчастак дарогі будзе аўтаматызаваны, — адзначыў спэцыяліст. — На такіх участках ня будзе шлягбаўмаў і пэрсаналу для спаганяньня платы з аўтамабілістаў».
Каментары