Затрыманы Вадзім Леван, каардынатар Руху «За Свабоду» па Гродзенскай вобласці. У яго бацькоў прайшлі вобшукі. Пра гэта паведаміла ў сваім фэйсбуку Настасся Губарэвіч, жонка старшыні Руху Юрася Губарэвіча.
Вобшукі прайшлі ў Бярозаўцы і Бердаўцы, пры іх прысутнічала маці і бацька Вадзіма, паведамляе сайт Pyx.by. Міліцыянты зацікавіліся паперамі, якія захоўваліся ў бацькоў дома ў Бердаўцы.
«Міліцыянты кажуць, што шукаюць супрацьзаконнае і будуць ізымаць», — адзначыў Леван. Ён сам пад’ехаў у той момант, калі міліцыянты ўжо выносілі паперы з дома. У двары дома прысутнічалі як міліцыянты ў форме, так і ў цывільным.
Як патлумачыў міліцыянт, яны прыехалі, бо сусед паскардзіўся, што ў гэтым доме вараць самагон, а пад час «законнага агляду, з санкцыі пракурора» было знойдзена вось гэта «незразумелае што».
Міліцыянты некалькі разоў мянялі рашэнне наконт самога Левана. У выніку адзін з іх заявіў, што той абавязаны праехаць з ім у РАУС, бо «ёсць такі артыкул як супраціўленне законным патрабаванням міліцыі». «Па якіх прычынах вы мяне забіраеце ў раённы аддзел?» — запытаўся Леван. «Для высвятлення далейшых абставінаў, усталявання адкуль гэтая прадукцыя», — цьмяна адказаў міліцыянт.
Потым іншы міліцыянт сказаў, што абласнога каардынатара Руху забіраюць у РАУС для высвятлення асобы. Хаця, як падкрэсліў Леван, «я магу паказаць пашпарт».
Пад час канфіскацыі дакументаў панятых не было.
На дадзены момант тэлефон Левана не доступны. Ён знаходзіцца ў Наваградскім РАУС.
Старшыню Руху «За Свабоду» Юрася Губарэвіча, нагадаем, суд Маладзечанскага раёна пакараў 11 сакавіка арыштам на 15 сутак за арганізацыю Маршу «Я недармаед» у Маладзечне.
Побач з Лукашэнкам на хакеі з'явілася новая прыгажуня10
Каментары