NASA запусціць на спадарожнік Сатурна падводную лодку для даследавання вуглевадародных вадаёмаў
Амерыканскія навукоўцы з даследчага ўніверсітэта Washington State University ў горадзе Пулман сумесна са спецыялістамі NASA распрацуюць «касмічную падводную лодку» для даследавання вуглевадародных вадаёмаў натуральнага спадарожніка планеты Сатурн Тытана, дзе тэмпература апускаецца да -180ºС, паведамляецца на сайце ўніверсітэта.
Адзначаецца, што Тытан цікавы для даследчыкаў праз здольнасць затрымліваць вадкасць на сваёй паверхні. На найбуйнейшым спадарожніку Сатурна ёсць рэкі, азёры і акіяны, выпадаюць ападкі, якія складаюцца з вуглевадародаў.
NASA плануе адправіць апарат да Тытана на працягу наступных 20 гадоў. Даследчыкі стварылі ў лабараторыі ўмовы, падобныя да ўмоваў на спадарожніку: сканструявалі спецыяльны рэзервуар, у які змясцілі вадкасць з метану, этану і іншых вуглевадародаў пры вельмі нізкай тэмпературы, а таксама запусцілі туды своеасаблівы «макет» субмарыны.
Адной з цяжкасцяў для навукоўцаў стала ўтварэнне бурбалак азоту падчас пагружэння падлодкі, бо тая вылучае цяпло. Гэта можа моцна ўскладніць правядзенне фота- і відэаздымкі.
Тытан — найбуйнейшы спадарожнік Сатурна, а таксама другі па велічыні спадарожнік у Сонечнай сістэме (пасля спадарожніка Юпітэра Ганімеда). З'яўляецца адзіным, акрамя Зямлі, целам у Сонечнай сістэме, для якога даказана стабільнае існаванне вадкасці на паверхні, і адзіным спадарожнікам, які валодае шчыльнай атмасферай. Нягледзячы на нізкую тэмпературу, Тытан супастаўляецца з Зямлёй на ранніх стадыях развіцця, і нельга выключаць, што на спадарожніку магчыма існаванне найпрасцейшых формаў жыцця, у прыватнасці, у падземных вадаёмах, дзе ўмовы могуць быць значна больш камфортнымі, чым на паверхні.
Каментары