Аляксандр Лукашэнка зрабіў кадравыя прызначэнні ў кіраўніцтве КДБ, піша БелТА
Лукашэнка прызначыў:
Калача Уладзіміра — намеснікам старшыні Камітэта дзяржаўнай бяспекі Рэспублікі Беларусь;
Равуцкага Дзмітрыя — начальнікам УКДБ па г. Мінску і Мінскай вобласці;
Сталярчука Алега — начальнікам УКДБ па Віцебскай вобласці;
Церахава Аляксандра — начальнікам УКДБ па Магілёўскай вобласці;
Невяроўскага Аляксандра — начальнікам УКДБ па Гродзенскай вобласці;
Гладышава Сяргея — начальнікам УКДБ па Брэсцкай вобласці;
Язерскага Вячаслава — начальнікам дзяржаўнай установы «Інстытут нацыянальнай бяспекі».
Уладзімір Калач да цяперашняга часу узначальваў УКДБ па г. Мінску і Мінскай вобласці, а Дзмітрый Равуцкі, які змяніў яго на гэтай пасадзе, — адно з галоўных упраўленняў цэнтральнага апарата КДБ.
Алег Сталярчук раней узначальваў Інстытут нацыянальнай бяспекі. Яго пераемнік на гэтай пасадзе Вячаслаў Язерскі працаваў на пасадзе начальніка УКДБ па Брэсцкай вобласці, на якую цяпер прызначаны Сяргей Гладышаў.
Ракіроўка адбылася ў кіраўніцтве упраўленняў КДБ па Магілёўскай і Гродзенскай абласцях. На аналагічныя пасады, але ў новыя рэгіёны прызначаныя Аляксандр Церахаў і Аляксандр Невяроўскі.
«Я спецыяльна запрасіў вас для таго, каб пагаварыць аб праблемах КДБ. Павінен сказаць, што (я часта пра гэта кажу) супакойвацца нам ніхто не дасць. У нас не так спакойна і вакол краіны — гэта таксама збольшага ваша праблема, ваша задача, — але там у нас ёсць вайскоўцы, яны павінны гарантаваць ваенную бяспеку дзяржавы.
Але і міліцыя, і КДБ — людзі не пабочныя. Улічваючы нават вопыт мінулай вайны, пад ружжо ўсталі ўсе, калі порахам запахла. Але галоўная ваша задача — гэта бяспека тых працэсаў і таго стану дзяржавы, якія забяспечваюцца ўнутры. Гэта ўнутраная бяспека. І вам вялікі давер. Але і вялікі спрос. Я хачу, каб вы гэта разумелі», — падкрэсліў кіраўнік краіны
Аляксандр Лукашэнка адзначыў, што КДБ многае робіць і ў плане эканамічнай бяспекі, абароны канстытуцыйнага ладу.
«Тая інфармацыя, якую я атрымліваю, яна аб'ектыўная. Няма гэтай палітыкі — дзе-небудзь што-небудзь прыўкрасіць, прыгожа напісаць, — сказаў беларускі кіраўнік. — Дзякуй богу, камітэт ад гэтага адышоў, як гэта было ў савецкія часы і пасля распаду саюза, і ў першыя гады майго прэзідэнцтва. Сёння часу прайшло дастаткова для таго, каб камітэт эфектыўна выконваў свае функцыі».
Лукашэнка таксама заўважыў, што перад КДБ у якасці адной з галоўных задач стаіць не толькі барацьба з карупцыяй, але ёсць і такія напрамкі, як разведка і контрразведка, пытанне забеспячэння ўрадавай сувязі. З'явіўся і новы напрамак — барацьба з тэрарызмам.
У сувязі з гэтым кіраўнік дзяржавы адзначыў, што дадзеная праблема не характэрная для Беларусі, аднак супакойвацца ні ў якім разе нельга, маючы на ўвазе тое, што адбываецца навокал. «Той тэрор, які ахапіў усю планету, не факт, што ён не зачэпіць і нас, хоць унутраных прычын для гэтага няма. Але, тым не менш, гэта таксама ваш кірунак», — падкрэсліў Аляксандр Лукашэнка.
Ён асабліва папярэдзіў аб недапушчальнасці таго, каб у КДБ з'явіліся тэндэнцыі, супраць якіх дадзеная структура і змагаецца.
«Я маю на ўвазе карупцыю, хабарніцтва, несумленныя, проста амаральныя паводзіны нашых кіраўнікоў знізу даверху. Не дай бог такія з'явы ў КДБ. Гэта проста будзе жудасна як для камітэта, ну і перш за ўсё для мяне. Народ мяне адразу папракне ў тым, што я занадта вам давяраў, а вы, глядзіце, якія самі», — звярнуў увагу Лукашэнка.
«Усё павінна быць сумленна і прынцыпова. Нікому ніякіх выключэнняў быць не павінна. Камітэт заўсёды ў любым нашым грамадстве, і ў савецкія часы, а цяпер тым больш, быў пэўным ачышчальнікам нашага грамадства. І я хачу, каб камітэт быў такім ачышчальнікам, каб там былі сумленныя, прынцыповыя, разумныя прафесіяналы, якія будуць разумець, што на нашых з вамі плячах ляжыць самае галоўнае і святое — бяспека нашай дзяржавы, суверэнітэт і незалежнасць», — заявіў ён.
«Калі вы праваліцеся на сваіх кірунках, вельмі цяжка будзе зачыніць гэты пралом іншымі органамі і падраздзяленнямі. Іх проста няма. Мы не дублюем, у цэлым, КДБ. Таму глядзіце, каб быў найстражэйшы парадак», — дадаў кіраўнік дзяржавы.
Ён таксама адзначыў, што многія з прызначаных ідуць працаваць у тэрытарыяльныя органы.
«Запомніце, ніякай кругавой парукі! Гэта вельмі акуратная праца — у вас, у пракурора, міліцыі. Я нездарма ствараў гэтую сістэму, па якой вы па вертыкалі падпарадкаваны старшыні КДБ. Але вы жывяце на тэрыторыі ў той ці іншай вобласці, і яны вырашаюць пэўныя пытанні, і там галоўны мой прадстаўнік — губернатар. І вы павінны знайсці агульную мову з кіраўніцтвам вобласці, але ні ў якім разе не пстрыкаючы абцасам… «чаго жадаеце». І не думаючы пра тое, што сёння я яму нешта там «дапамагу», а заўтра ён мне нешта добрае зробіць. За камітэтам асаблівае вока ў гэтым сэнсе. Бо шкоды ад кампанейшчыны і кругавой парукі будзе больш, чым змыканне, дапусцім, губернатара з іншымі кіраўнікамі органаў і падраздзяленняў», — сказаў кіраўнік дзяржавы.
Аляксандр Лукашэнка дадаў, што вельмі давярае КДБ. «Я яшчэ з дэпутацкіх часоў памятаю добрых маладых хлопцаў, з якімі я працаваў насуперак кіраўніцтву КДБ, якія таемна прыносілі мне дакументы, характарызуючы тых ці іншых карупцыянераў у вышэйшых эшалонах улады, — распавёў ён.
— Гэта былі шчырыя маладыя хлопцы, якія разумелі, што так быць не павінна. І з таго часу ў мяне, нават з савецкіх часоў, склаліся самыя добрыя ўспаміны і меркаванне пра КДБ. Таму я і давяраю КДБ. Але каму давяраеш, таго трэба і сур'ёзна правяраць».
Старшыня КДБ Валерый Вакульчык распавёў, што ўсе кадравыя рашэнні вывераныя, да іх рыхтаваліся больш чым паўгода. «Кадры падрыхтаваныя. Гэта маладыя перспектыўныя кіраўнікі, і ёсць абгрунтаваная упэўненасць, што гэта будзе спрыяць павышэнню эфектыўнасці работы камітэта, - сказаў ён. - Гэта людзі прынцыповыя. Яны здольныя прымаць рашэнні, і мы ўжо пераканаліся, што гэтыя рашэнні вывераныя і прымаюцца з дзяржаўнага пункту гледжання».
Каментары