Łukašenka zrabiŭ kadravyja pierastanoŭki ŭ kiraŭnictvie KDB

Alaksandr Łukašenka zrabiŭ kadravyja pryznačeńni ŭ kiraŭnictvie KDB, piša BiełTA

Łukašenka pryznačyŭ:

Kałača Uładzimira — namieśnikam staršyni Kamiteta dziaržaŭnaj biaśpieki Respubliki Biełaruś;

Ravuckaha Dźmitryja — načalnikam UKDB pa h. Minsku i Minskaj vobłaści;

Stalarčuka Aleha — načalnikam UKDB pa Viciebskaj vobłaści;

Cierachava Alaksandra — načalnikam UKDB pa Mahiloŭskaj vobłaści;

Nieviaroŭskaha Alaksandra — načalnikam UKDB pa Hrodzienskaj vobłaści;

Hładyšava Siarhieja — načalnikam UKDB pa Bresckaj vobłaści;

Jazierskaha Viačasłava — načalnikam dziaržaŭnaj ustanovy «Instytut nacyjanalnaj biaśpieki».

Uładzimir Kałač da ciapierašniaha času uznačalvaŭ UKDB pa h. Minsku i Minskaj vobłaści, a Dźmitryj Ravucki, jaki źmianiŭ jaho na hetaj pasadzie, — adno z hałoŭnych upraŭleńniaŭ centralnaha aparata KDB.

Aleh Stalarčuk raniej uznačalvaŭ Instytut nacyjanalnaj biaśpieki. Jaho pierajemnik na hetaj pasadzie Viačasłaŭ Jazierski pracavaŭ na pasadzie načalnika UKDB pa Bresckaj vobłaści, na jakuju ciapier pryznačany Siarhiej Hładyšaŭ.

Rakiroŭka adbyłasia ŭ kiraŭnictvie upraŭleńniaŭ KDB pa Mahiloŭskaj i Hrodzienskaj abłaściach. Na anałahičnyja pasady, ale ŭ novyja rehijony pryznačanyja Alaksandr Cierachaŭ i Alaksandr Nieviaroŭski.

«Ja śpiecyjalna zaprasiŭ vas dla taho, kab pahavaryć ab prablemach KDB. Pavinien skazać, što (ja časta pra heta kažu) supakojvacca nam nichto nie daść. U nas nie tak spakojna i vakoł krainy — heta taksama zbolšaha vaša prablema, vaša zadača, — ale tam u nas jość vajskoŭcy, jany pavinny harantavać vajennuju biaśpieku dziaržavy.

Ale i milicyja, i KDB — ludzi nie pabočnyja. Uličvajučy navat vopyt minułaj vajny, pad ružžo ŭstali ŭsie, kali poracham zapachła. Ale hałoŭnaja vaša zadača — heta biaśpieka tych pracesaŭ i taho stanu dziaržavy, jakija zabiaśpiečvajucca ŭnutry. Heta ŭnutranaja biaśpieka. I vam vialiki davier. Ale i vialiki spros. Ja chaču, kab vy heta razumieli», — padkreśliŭ kiraŭnik krainy

Pavialičyć

Alaksandr Łukašenka adznačyŭ, što KDB mnohaje robić i ŭ płanie ekanamičnaj biaśpieki, abarony kanstytucyjnaha ładu.

«Taja infarmacyja, jakuju ja atrymlivaju, jana abjektyŭnaja. Niama hetaj palityki — dzie-niebudź što-niebudź pryŭkrasić, pryhoža napisać, — skazaŭ biełaruski kiraŭnik. — Dziakuj bohu, kamitet ad hetaha adyšoŭ, jak heta było ŭ savieckija časy i paśla raspadu sajuza, i ŭ pieršyja hady majho prezidenctva. Siońnia času prajšło dastatkova dla taho, kab kamitet efiektyŭna vykonvaŭ svaje funkcyi».

Łukašenka taksama zaŭvažyŭ, što pierad KDB u jakaści adnoj z hałoŭnych zadač staić nie tolki baraćba z karupcyjaj, ale jość i takija napramki, jak raźviedka i kontrraźviedka, pytańnie zabieśpiačeńnia ŭradavaj suviazi. Źjaviŭsia i novy napramak — baraćba z teraryzmam.

U suviazi z hetym kiraŭnik dziaržavy adznačyŭ, što dadzienaja prablema nie charakternaja dla Biełarusi, adnak supakojvacca ni ŭ jakim razie nielha, majučy na ŭvazie toje, što adbyvajecca navokał. «Toj teror, jaki achapiŭ usiu płanietu, nie fakt, što jon nie začepić i nas, choć unutranych pryčyn dla hetaha niama. Ale, tym nie mienš, heta taksama vaš kirunak», — padkreśliŭ Alaksandr Łukašenka.

Jon asabliva papiaredziŭ ab niedapuščalnaści taho, kab u KDB źjavilisia tendencyi, suprać jakich dadzienaja struktura i zmahajecca.

«Ja maju na ŭvazie karupcyju, chabarnictva, niesumlennyja, prosta amaralnyja pavodziny našych kiraŭnikoŭ źnizu davierchu. Nie daj boh takija źjavy ŭ KDB. Heta prosta budzie žudasna jak dla kamiteta, nu i pierš za ŭsio dla mianie. Narod mianie adrazu papraknie ŭ tym, što ja zanadta vam daviaraŭ, a vy, hladzicie, jakija sami», — źviarnuŭ uvahu Łukašenka.

«Usio pavinna być sumlenna i pryncypova. Nikomu nijakich vyklučeńniaŭ być nie pavinna. Kamitet zaŭsiody ŭ lubym našym hramadstvie, i ŭ savieckija časy, a ciapier tym bolš, byŭ peŭnym ačyščalnikam našaha hramadstva. I ja chaču, kab kamitet byŭ takim ačyščalnikam, kab tam byli sumlennyja, pryncypovyja, razumnyja prafiesijanały, jakija buduć razumieć, što na našych z vami plačach lažyć samaje hałoŭnaje i śviatoje — biaśpieka našaj dziaržavy, suvierenitet i niezaležnaść», — zajaviŭ jon.

«Kali vy pravaliciesia na svaich kirunkach, vielmi ciažka budzie začynić hety prałom inšymi orhanami i padraździaleńniami. Ich prosta niama. My nie dublujem, u cełym, KDB. Tamu hladzicie, kab byŭ najstražejšy paradak», — dadaŭ kiraŭnik dziaržavy.

Jon taksama adznačyŭ, što mnohija z pryznačanych iduć pracavać u terytaryjalnyja orhany.

«Zapomnicie, nijakaj kruhavoj paruki! Heta vielmi akuratnaja praca — u vas, u prakurora, milicyi. Ja niezdarma stvaraŭ hetuju sistemu, pa jakoj vy pa viertykali padparadkavany staršyni KDB. Ale vy žyviacie na terytoryi ŭ toj ci inšaj vobłaści, i jany vyrašajuć peŭnyja pytańni, i tam hałoŭny moj pradstaŭnik — hubiernatar. I vy pavinny znajści ahulnuju movu z kiraŭnictvam vobłaści, ale ni ŭ jakim razie nie pstrykajučy abcasam… «čaho žadajecie». I nie dumajučy pra toje, što siońnia ja jamu niešta tam «dapamahu», a zaŭtra jon mnie niešta dobraje zrobić. Za kamitetam asablivaje voka ŭ hetym sensie. Bo škody ad kampaniejščyny i kruhavoj paruki budzie bolš, čym zmykańnie, dapuścim, hubiernatara ź inšymi kiraŭnikami orhanaŭ i padraździaleńniaŭ», — skazaŭ kiraŭnik dziaržavy.

Pavialičyć

Alaksandr Łukašenka dadaŭ, što vielmi daviaraje KDB. «Ja jašče z deputackich časoŭ pamiataju dobrych maładych chłopcaŭ, ź jakimi ja pracavaŭ nasupierak kiraŭnictvu KDB, jakija tajemna prynosili mnie dakumienty, charaktaryzujučy tych ci inšych karupcyjanieraŭ u vyšejšych ešałonach ułady, — raspavioŭ jon.

— Heta byli ščyryja maładyja chłopcy, jakija razumieli, što tak być nie pavinna. I z taho času ŭ mianie, navat z savieckich časoŭ, skłalisia samyja dobryja ŭspaminy i mierkavańnie pra KDB. Tamu ja i daviaraju KDB. Ale kamu daviaraješ, taho treba i surjozna praviarać».

Staršynia KDB Valeryj Vakulčyk raspavioŭ, što ŭsie kadravyja rašeńni vyvieranyja, da ich rychtavalisia bolš čym paŭhoda. «Kadry padrychtavanyja. Heta maładyja pierśpiektyŭnyja kiraŭniki, i jość abhruntavanaja upeŭnienaść, što heta budzie spryjać pavyšeńniu efiektyŭnaści raboty kamiteta, - skazaŭ jon. - Heta ludzi pryncypovyja. Jany zdolnyja prymać rašeńni, i my ŭžo pierakanalisia, što hetyja rašeńni vyvieranyja i prymajucca ź dziaržaŭnaha punktu hledžańnia».

• 0
• 0
• 0
• 0
• 0
• 0
• 0
• 0