СБУ заявіла, што ідэнтыфікавала асобы 206 наймітаў расійскай ПВК Вагнера, якія бралі ўдзел у ваенных дзеяннях у Сірыі ў лютым гэтага года. Сцвярджаецца, што сярод іх — 11 беларусаў, імёны і фота шасці ўкраінскія чэкісты апублікавалі.
Руслан Бабінін
У спісе СБУ згаданы 51-гадовы мінчук Руслан Бабінін. Служба адзначае, што гэты ж чалавек у 2003 годзе быў у сюжэце канала «Расія 1» аб байцах Французскага замежнага легіёна.
На той момант мужчына служыў у легіёне 6 гадоў, паводле яго слоў, кіроўцам у інжынерных войсках. Але збіраўся неўзабаве мяняць працу і дзяліўся марай: купіць мікрааўтобус і вазіць турыстаў па Блакітным беразе.
Калегі з такім жа імем памятаюць выпускніка 1991 года з Вышэйшага вайскова-палітычнага авіяцыйнага вучылішча ў горадзе Кургане (Расія). Згадвалі, што Руслан Бабінін з чацвёртай роты (называлі яшчэ «Боб») пераехаў у Францыю, служыць у легіёне. Мабыць, гаворка пра таго ж самага чалавека.
У сеціве ёсць некалькі старонак Руслана Бабініна (той жа чалавек з сюжэта); дата нараджэння і адукацыя супадаюць. Там ён пазначыў, што жыве ў Парыжы, а з 2006 года працуе прадпрымальнікам у сферы турызму. Большасць сяброў і здымкаў — з Францыі, хоць пару тыдняў таму паведамляў пра сваё знаходжанне ў Расіі.
У 2000-я гэтага ж чалавека шукаў мужчына, які пазнаў у тэлесюжэце аб Французскім легіёне свайго зводнага брата. Згадваў, што сам Руслан нарадзіўся ў Грозным у 1967 годзе (дата супадае), потым сям'я жыла ў Алма-Аце (Казахстан), а пасля брат перабраўся з маці ў Беларусь. Па яшчэ адных даных, жанчына па-ранейшаму жыве ў адным з беларускіх абласных цэнтраў.
На паведамленні Tut.by ні Бабінін, ні яго маці не адказалі.
Эдвард Давыдаў
У спісе СБУ — 27-гадовы ўраджэнец горада Іванава Эдвард Давыдаў. Як паведамляе ўкраінскі партал «Міратворац», Эдвард Давыдаў — «беларускі найміт, удзельнічаў у баявых дзеяннях на тэрыторыі Украіны, сябра расійскай ПВК (прыватнай вайсковай кампаніі)». Аднак доказаў яго ўдзелу ў баявых дзеяннях у Сірыі спецслужба не падала.
Эдвард Давыдаў нарадзіўся і вырас у Іванаве, у 2008 годзе скончыў мясцовую сярэднюю школу.
— Яго выхоўвала маці, — распавёў сябар дзяцінства Юрый і дадаў, што пасля заканчэння школы хлопец застаўся сіратой, братоў і сясцёр у яго таксама не было.
Пасля школы Эдвард сышоў у войска. Службу праходзіў у Слоніме. Былыя калегі пра яго адгукаюцца станоўча.
— Пазітыўны пафігіст, — распавёў былы калега Максім.
Пасля войска Эдвард з'ехаў у Расію працаваць «на будаўнічых шабашках». Перыядычна прыязджаў на радзіму да сяброў. Па словах знаёмых, Давыдаў апошні раз прыязджаў на малую радзіму каля чатырох месяцаў таму.
Сябры характарызуюць яго як «адэкватнага» і «спакойнага» чалавека. Навіны пра яго ўдзел у вайне ў Сірыі або канфлікце на ўсходзе Украіны яны ўспрынялі са здзіўленнем.
На старонцы Эдварда ў сацсетках горадам пражывання названая Масква. Апошні допіс датуецца сакавіком 2013 года. У альбомах знаходзяцца фатаграфіі са службы, работы і сустрэч з сябрамі. Звязацца з ім не атрымалася.
Сяргей Сазанаў
Сазанаў — былы міліцыянт. Падчас службы не аднойчы атрымліваў званні «Найлепшы супрацоўнік міліцыі», раскрыў дзясяткі крымінальных спраў, у 90-я асабіста затрымліваў асабліва небяспечных удзельнікаў злачынных груповак. Пра гэта шмат разоў пісалі газеты: вось ён выратаваў на пажары чалавека, вось — выцягнуў з вады дзяўчынку, якая танула, потым — яшчэ трох чалавек… Але пасля 17 гадоў службы Сяргей нечакана для ўсіх сышоў з органаў. Кажа, што «не захацеў больш быць у сістэме».
Затым у лёсе былога міліцыянта пачалі адбывацца дзіўныя падзеі. Падрабязнасцей Сазанаў не расказваў. Казаў толькі адно: супраць яго ў роднай Рэчыцы нібыта арганізавана цкаванне, маўляў, не мог нават уладкавацца на працу.
Гэта ж праз два гады нам расказаў і яго знаёмы.
У Сяргея Сазанава ёсць старонка ў сацыяльнай сетцы, але яна не абнаўлялася на працягу некалькіх гадоў. 27 ліпеня звязацца з ім не ўдалося.
Вадзім Юшкевіч і Канстанцін Гірс
Вадзіму Юшкевічу 37 гадоў, скончыў школу ў Наваполацку, Акадэмію МУС Беларусі.
Вадзім спартыўны, цікавіцца футболам, хакеем, экстрэмальнымі відамі спорту.
Аднак апошні раз у сацыяльных сетках ён быў некалькі гадоў таму.
Мужчына зарэгістраваны на адным з расійскіх сайтаў знаёмстваў — там напісана, што жыве ён у Данецку, Украіна.
32-гадовы Канстанцін Гірс у войску служыў у ПДВ. На асабістай старонцы ў сацыяльнай сетцы шмат відэа, прысвечаных гэтаму роду войскаў, а таксама вулічным рукапашным баям.
Быў індывідуальным прадпрымальнікам. У якасці ІП быў зарэгістраваны ў Наваполацку. У лютым 2016 го структура знаходзілася ў працэсе ліквідацыі. Прадпрымальніцкая дзейнасць не ажыццяўлялася на працягу 12 месяцаў запар.
Чалавек, які адказвае ў сацсетках як Канстанцін Гірс, адмовіўся размаўляць з карэспандэнтам.
Знайсці інфармацыю пра Аляксандра Ступніцкага не ўдалося.
Цяпер чытаюць
Памёр паэт Уладзімір Карызна, аўтар слоў да цяперашняга дзяржаўнага гімна Беларусі2
Каментары