З пешаходнай Камсамольскай міліцыя прагнала вулічнага музыканта. Аказваецца, там нельга выступаць
У пятніцу з новай пешаходнай зоны на Камсамольскай міліцыя прагнала вулічнага музыканта, паведамілі Tut.by відавочцы.
Пасля рэканструкцыі на пешаходнай Камсамольскай з'явіліся вулічныя музыкі, распавядае заснавальнік салона «Сарокі» Ксенія Фёдарава. Яны граюць каля гадзіннікаў на скрыжаванні з Рэвалюцыйнай, што робіць абстаноўку весялейшай.
Не стала выключэннем і гэтая пятніца. Як распавядае майстар салона Дыяна, днём каля гадзіннікаў граў гурт, вечарам — выступаў хлопец з гітарай, вакол якога сабраліся людзі. Але каля 21.00 да яго падышлі міліцыянты і сказалі, што на музыку паступіла скарга. Яны папрасілі яго сысці. А ў суботу і нядзелю вулічных музыкаў тут ужо не было.
І які тады сэнс у пешаходнай зоне, дзе нельга граць вулічным музыкам?
Калі паглядзець на сітуацыю фармальна, то выступаць на вуліцы ў Мінску могуць толькі ўдзельнікі фестывалю «Пешаходка» і толькі ў пэўных месцах. Сярод іх шмат добрых лакацый, але рэканструяваных Камсамольскай і Рэвалюцыйнай у гэтым спісе няма. Такім чынам, выступленні тут падпадаюць ўжо пад заканадаўства аб масавых мерапрыемствах і міліцыя мае права спыняць іх. Тым больш, калі на музыку паступае скарга.
Як распавёў Tut.by начальнік упраўлення культуры Мінгарвыканкама Аляксандр Шастакоў, пытанне развіцця і павелічэння пляцовак у рамках «Пешаходкі» знаходзіцца ў стадыі абмеркавання.
А гэта значыць, што заўтра і паслязаўтра сітуацыя не зменіцца. Да таго ж заяўкі на «Пешаходку» падаюцца толькі адзін раз за год — увесну.
Але гэта яшчэ не азначае, што вулічных музыкаў будуць праганяць з Камсамольскай заўсёды. Яшчэ адзін суразмоўца ў мэрыі кажа, што на практыцы іх не чапаюць там, дзе яны не замінаюць.
Цяпер чытаюць
У Познані гінеколаг выдаліў 24‑гадовай беларусцы матку і яечнікі без яе згоды. Яму пагражае да 20 гадоў турмы5
Каментары