У суботу ўвечары ў цэнтры Рыгі сабраліся тысячы людзей. У гонар 100-годдзя незалежнасці Латвіі на цэнтральнай плошчы зладзілі нешта падобнае да нашага спеўнага сходу, перадае карэспандэнт «Нашай Нівы» з Рыгі. Старшакласнікі спявалі латышскія гімны пад суправаджэнне аркестру. У дзяўчын у валасах былі заплеценыя стужкі колеру сцяга Латвіі, у хлопцаў такія ж — на заплечніках і куртках. Шмат шалікаў і шапак з нацыянальнымі матывамі.
Людзей было вельмі шмат — і як латышскамоўных, гэтак і рускамоўных. 50 на 50, як і ў цэлым па Рызе. Ясна, што ніякай паліцыі.
Натхняла, што 25 Сакавіка гэтай вясной у Беларусі ў куды менш спрыяльных умовах, без дапамогі ўлады, атрымалася зрабіць свята прынамсі не горшае за латвійскае.
Сёння ж, у нядзелю, у Рызе сабраліся кіраўнікі балтыйскіх і скандынаўскіх краін. Прыехалі кіраўнікі Эстоніі, Фінляндыі і Ісландыі.
Каментары