Сёння ў галоўны офіс групы кампаній «Паціа», якая кіруе сеткай крамаў бытавой тэхнікі і электронікі «5 элемент», прыйшлі праваахоўныя органы. Пра гэта Tut.by паведамілі інфармаваныя крыніцы і пацвердзілі ў самой кампаніі.
«З самага ранку падняўся кіпіш у офісе. Былі маскі-шоу. Мала хто зразумеў, што адбываецца. Сілавікі працягваюць знаходзіцца ў офісе», — сказала крыніца.
«Нічога экстраардынарнага пакуль не адбываецца. Ніхто не затрыманы, ніякіх абвінавачванняў не прад'яўлена, канфіскоўваюцца дакументы па некаторых контрагентах для праверкі. Офіс кампаніі і ўсе крамы працуюць у штатным рэжыме», — растлумачылі ў «Паціа».
Атрымаць аператыўны каментар у сілавых ведамствах пакуль не ўдалося.
У гісторыі «Паціа» ёсць прыклады, калі ёй даводзілася адбіваць прэтэнзіі кантралюючых органаў. У снежні 2014 года Мінгандлю прыпыніла працу трох крамаў сеткі «5 элемент» з-за парушэнняў заканадаўства аб гандлі. Адна з ключавых прэтэнзій — недастатковая колькасць тавараў беларускай вытворчасці.
Тагачасны памочнік прэзідэнта, а сёння першы намеснік кіраўніка Адміністрацыі прэзідэнта Максім Рыжанкоў назваў «нязграбнымі» дзеянні Мінгандлю супраць «5 элемента». «Усім зараз цяжка, вы ведаеце, якая сітуацыя. Але замест таго, каб вырашыць пытанні ў рэжыме дыялогу, мы размахвалі дубінай», — сказаў тады Рыжанкоў.
«5 элемент» з'яўляецца партнёрам федэрацый футбола, тэніса і баскетбола. А адзін з заснавальнікаў рытэйлера Андрэй Балабін (№ 68 у топ-200 самых паспяховых і ўплывовых бізнэсменаў па версіі «Ежедневніка») — намеснікам Рыжанкова ў федэрацыі баскетбола. У цяперашні час сетка налічвае больш за 50 крамаў бытавой тэхнікі і электронікі. Балабін недаступны для каментароў.
Каментары