Раніцай 16 верасня паліцыя Марыупаля знайшла застрэленым у пад’ездзе аднаго з жылых дамоў баевіка «ДНР» Рамана Джумаева, якога нядаўна выпусцілі з украінскай турмы пад хатні арышт, паведамляе Белсат.
Пра гэта паведамляе кіеўскае выданне lb.ua са спасылкай на крыніцы ў праваахоўных органах. На дадзены момант паліцыя высвятляе абставіны здарэння.
5 жніўня суд Кастрычніцкага раёна Марыупаля пастанавіў адпусціць пад хатні арышт Рамана Джумаева разам з яшчэ адным баевіком — абодвух вінавацілі ва ўдзеле ў тэрарыстычнай групоўцы і незаконным узброеным фармаванні, гвалце ў дачыненні да працаўніка праваахоўных органаў (арт. 258-3, 260 і 345 КК Украіны). Максімальнае пакаранне для ўдзельніка незаконнага ўзброенага фармавання магло скласці да 15 гадоў турмы.
Джумаеў — украінец, нарадзіўся ў 1991 годзе ў Марыупалі. Летам 2014 году пайшоў ваяваць на бок «ДНР» у складзе інтэрбрыгады «Пятнашка». Ён прайшоў баі пад Дэбальцава і ў раёне Данецкага аэрапорту. Летам 2015 году баявік пакінуў Данбас і пераехаў жыць да сваякоў у Беларусь. Амаль год ён прапрацаваў менеджарам па продажах у Мар’інай Горцы пад Менскам.
Ніякай увагі беларускіх праваахоўных органаў Джумаеў на сабе не адчуваў. Пра гэта ён распавядаў у інтэрв’ю Радыё Свабода ў сакавіку 2016-га.
«Нашых тут шмат», — сцвярджаў баявік у адказ на пытанне журналіста, ці не баіцца ён экстрадыцыі ва Украіну, бо на той момант як мінімум адна крымінальная справа ў дачыненні да яго там ужо была распачатая.
Аднак Джумаеў здолеў вярнуцца ў Марыупаль самастойна. З верасня 2017 па травень 2018 ён знаходзіўся пад вартай, але потым яго выпусцілі пад хатні арышт. За некалькі месяцаў на волі той нават паспеў адкрыць уласны бізнес: без дазволу ўладаў паставіў на вуліцы кіёск. Калі ў 2018 годзе кіёск дэмантавала паліцыя, Джумаеў пырснуў газавым балончыкам і напаў на паліцыянта, а таксама на ветэрана АТА, за што быў зноў затрыманы.
Сёлета ў жніўня яго ў чарговы раз адпусцілі з СІЗА пад хатні арышт, паведамляў марыупальскі актывіст Аляксей Лепірыдзі са спасылкай на Адзіны рэестр судовых рашэнняў Украіны.
У дзень, калі памілавалі палітвязня Дароніна, ягонай жонцы прысудзілі 8,5 гадоў калоніі за ўдзел у дваровым чаце6
Каментары