МУС паведамляе пра затрыманне двух «партызанаў» пры спробе сабатажу на чыгунцы
«За спробу прывесці ў непрыдатнасць чыгуначныя калеі затрыманыя два чалавекі, — паведамляе прэс-служба Міністэрства ўнутраных спраў. — Увечары 11 лістапада паблізу прыпынку «Вязынка» супрацоўнікі Маладзечанскага РАУС заспелі двух мужчын, якія спрабавалі нешта зрабіць на чыгуначных каляінах. Калі міліцыянты падышлі бліжэй, тыя кінуліся бегчы.
Адзін пабег у бок вёскі Ліпені да схаванага ў кустах аўтамабіля. Мужчыну затрымалі і выявілі ў яго ў заплечніку бутэльку з бензінам, балаклаву і абцугі. Другога выявілі за 1,5 км ад чыгункі — уцякач хаваўся ў лесе.
Затрыманыя выявіліся сваякамі з Радашкавіч (36 і 37 гадоў). Яны наклалі чатырохметровы металічны дрот на перагоне «Радашкавічы — Дубрава» і вышмаравалі спецсродкам балты для паляпшэння электракантакту. Праваахоўнікі аператыўна знайшлі расцяжку і не дапусцілі фальшывага спрацоўвання святлафора і блакавання руху цягнікоў.
Са слоў затрыманых, яны збіраліся разліць бензін на шляху адыходу, думаючы, што такім чынам змогуць збіць са тропу службовага сабаку.
Затрыманых пасадзілі ў Ізалятар часовага ўтрымання, заведзеная крымінальная справа.
Каментары