З Беларусі высылаюць беларускамоўнага беларуса з расійскім пашпартам. Бо ўдзельнічаў у пратэстах
Вярнуцца Алег Малашчанка ў Беларусь зможа толькі праз тры гады, піша Intex-Press.
Жыхара Баранавіч, вайсковага пенсіянера Алега Малашчанку 25 лістапада запрасілі ў аддзяленне па грамадзянстве і міграцыі Баранавіцкага ГАУС для абмеркавання рашэння аб яго высылцы з краіны, распавяла Intex-press ягоная жонка Таццяна. Увечары ў сябе на старонцы ў фэйсбуку Алег Малашчанка пакінуў паведамленне: «Высылка з краіны, без права ўезду на тры гады, пакінуць краіну да 25.12.2020».
На абскарджанне рашэння аддзялення па грамадзянстве і міграцыі Баранавіцкага ГАУС у сям'і Малашчанкаў ёсць тры дні, сказала Intex-press Таццяна.
Алег Малашчанка — ураджэнец Баранавіч. З сям'ёй ён жыве ў горадзе з 2004 года. У яго двое непаўналетніх дзяцей, жонка і 85-гадовая маці. Мужчына — былы афіцэр, заканчваў ваенную службу ў Расіі, таму аўтаматычна атрымаў расійскае грамадзянства. Пасля службы пераехаў на радзіму, некалькі гадоў быў уладальнікам крамы «Вадзянік», а пазней уладкаваўся працаваць на авіязавод.
Сям'я Малашчанкаў актыўна ўдзельнічае ў грамадскім жыцці горада. Яны дамагліся адкрыцця ў горадзе беларускамоўных класаў, удзельнічалі ў нацыянальных праектах і папулярызацыі беларускай культуры, неаднаразова былі назіральнікамі на выбарах.
На думку жонкі Алега, Таццяны Малашчанка, мужа хочуць выслаць з краіны з-за таго, што ўлады лічаць мужчыну адным з завадатараў пратэстаў у ААТ «558 авіяцыйны рамонтны завод», якія прайшлі пасля прэзідэнцкіх выбараў.
— Мы, вядома, спадзяваліся на лепшае, але ілюзій аб тым, што мужа пакінуць у Беларусі, я не мела. Мяне здзівіла, што Алега высылаюць з краіны ў добраахвотным парадку, а не прымусова. Так што нам не давядзецца збіраць рэчы прыхапкам, — распавяла Таццяна Малашчанка.
Па cловам Таццяны, у аддзяленні па грамадзянстве і міграцыі Баранавіцкага ГАУС Алегу не выдалі копію дакумента, у якім напісана дакладная прычына дэпартацыі, і таксама не далі яго сфатаграфаваць. Малашчанка пры азнаямленні з дакументам паспеў прачытаць, што адной з прычын дэпартацыі быў удзел у акцыях пратэсту.
Сям'ю Малашчанкаў цяпер вельмі непакоіць тое, што з-за высылкі на тры гады з краіны Алег можа больш не ўбачыць сваю састарэлую маці.
— Жанчыне 85 гадоў, а высылка на тры гады без права на ўезд — гэта ўсё ж тэрмін для пенсіянера, — перажывае Таццяна.
Цяпер чытаюць
Хто тыя 17‑гадовы блогер і яго 37‑гадовая нявеста, якія шыкоўна жылі на грошы са збору на хворае дзіця?34
Каментары