«Вучыўся граць, каб падтрымаць беларусаў у гэты няпросты час». Як барабаншчык з маршаў стаў фігурантам крымінальнай справы
Барабаншчыкі з «Патрабуем разысціся!» нарабілі шуму на пратэстах. Людзі радасна віталі іх на маршах, запрашалі на дваровыя канцэрты. А пасля музыкаў пачалі прэсаваць. Адзін з іх — Аляксей Санчук — з лістапада застаецца за кратамі. Блізкія расказалі пра палітвязня, яго сям’ю і захапленне барабанамі.
Аляксей не прафесійны музыка. Ён вучыўся ў мінскім архітэктурна-будаўнічым каледжы, пасля на завочцы ў Полацкім дзяржаўным універсітэце па тым жа профілі. Працаваў зборшчыкам мэблі. «Майстар на ўсе рукі, ён умее рабіць усё», — апісваюць 30-гадовага хлопца сябры.
Расказваюць яны і пра дабрыню Аляксея, яго любоў да жывёл.
«Незадоўга да затрымання ён выратаваў маленькае кацяня, якое амаль замерзла. Прынёс яго дадому, вазіў у ветэрынарную клініку, купляў лекі, а пасля прыстроіў у добрыя рукі — у яго дома жыве кошка, і ён не мог сабе пакінуць гадаванца. А яшчэ Аляксей сам зрабіў вялікі акварыум, у якім жывуць дзве марскія чарапашкі», — дзеляцца блізкія.
Барабаны — хобі Аляксея. Ён сам развучваў рытм і раней не выступаў. З музыкамі з «Патрабуем разысціся!» пазнаёміўся на адным з маршаў, пару раз з’ездзіў на рэпетыцыі. Кажуць, хацеў навучыцца граць, бо лічыў, што гэта падтрымлівае беларусаў у такі няпросты час.
У барабаншчыка ёсць сям’я — жонка і 8-гадовая дачка.
«Яна вельмі развітая дзяўчынка, што ў многім заслуга Аляксея — ён заўсёды вадзіў яе на ўсемагчымыя гурткі. Сваімі рукамі зрабіў велізарны лялечны домік для дачкі», — расказваюць пра мужчыну.
Першы раз Аляксея затрымалі яшчэ ў жніўні да выбараў — за расклейку плакатаў. Яго машыну эвакуявалі, бо знайшлі там улёткі на выбарчую тэматыку. Суд пакараў тады хлопца 10 суткамі.
Другі раз узялі падчас рэпетыцыі 4 лістапада. Тады ў гаражы затрымалі дзевяць музыкаў. Тры дзяўчыны атрымалі штраф па 30 базавых, хлопцы — суткі. Аляксею суддзя Вікторыя Шабуня дала 15 сутак — па артыкуле 23.34. Па словах бабараншчыкаў, хлопца тады збілі і прымусілі разблакаваць тэлефон. У ім убачылі кропкі збору на марш — магчыма, падумалі, што Аляксей з ліку арганізатараў.
На АНТ пасля выпусцілі сюжэт, дзе заявілі, што барабаншчыкі не толькі выступаюць на маршах і дваравых канцэртах, але яшчэ збіраліся спаліць чучала з выявай прадстаўніка ўлады. Паказалі і допыт Аляксея. Ён кажа, што не разумее, за што яго затрымалі. «Я хацеў навучыцца пэўнаму рытму. Пры сабе не меў атрыбутыкі», — адказваў хлопец на пытанні супрацоўніка.
На волю ён ужо не выйшаў — выставілі абвінавачанне па артыкуле 342 Крымінальнага кодэкса.
Цяпер Аляксей на Валадарцы. Лісты ад яго прыходзяць часта. У іх ён піша, што спадзяецца на лепшае і вельмі хоча дадому да сям’і.
«Умовы цярпімыя, але кнігі не дазваляюць перадаваць. На шпацыр водзяць раз на дзень, у асноўным ранкам», — расказалі крыху пра яго быт за кратамі таварышы.
«Для сям’і тое, што здарылася, — гэта шок, — прызнаюцца блізкія. — Дачка таксама ведае, дзе тата: яна ўсё чуе і разумее. Лічыць тату героем».
Цяпер чытаюць
Беларус жыве ў доме, які пабудаваў з саломы, пяску і гліны. Пры гэтым ён — адзіны жыхар вёскі. Як адчуванні?5
Каментары