Часам складана і рызыкоўна вяртацца да звыклых вам фізічных нагрузак. Вось некалькі парад ад навукоўцаў, як лепш да гэтага падысці.
У некаторых людзей назіраюцца посткавідныя ўскладненні, якія робяць фізічныя практыкаванні больш рызыкоўнымі. А многія пацыенты з кавідам маюць яго сімптомы на працягу некалькіх тыдняў або нават месяцаў, што ўскладняе нават невялікую фізічную актыўнасць. Таму перш за ўсё навукоўцы раяць паступова павялічваць нагрузку пад назіраннем доктара, піша The Wall Street Journal.
Па меркаванні Дэвіда Салмана, доктара і навуковага супрацоўніка Імперскага каледжа Лондана, людзі могуць адчуваць сябе добра, але ёсць верагоднасць, што фізічная нагрузка прывядзе да рэцыдыву. Аднак фізічная актыўнасць, безумоўна, неабходная, таму варта дасягнуць правільнага балансу.
Дэвід Салман з’яўляецца адным з аўтараў артыкула, апублікаванага ў Брытанскім медыцынскім часопісе (The BMJ), які змяшчае рэкамендацыі па аднаўленні фізічнай актыўнасці пасля кавіду. Салман не рэкамендуе вяртацца да практыкаванняў да таго часу, пакуль як мінімум на працягу сямі дзён не будзе заўважна сімптомаў кавіду. Толькі тады можна вяртацца да мінімальных нагрузак. Пры гэтым варта ўлічваць папярэдні ўзровень актыўнасці і не перагружаць арганізм.
Эксперт падзяляе ступені фізічнай нагрузкі на 4 фазы. Гэта індывідуальная ацэнка фізічнага напружання па шкале ад 6 да 20 ад адсутнасці напружання ўвогуле (6) да максімальнай стомленасці (20). Варта даваць арганізму нагрузку ў межах адной фазы на працягу не менш за сем дзён і толькі пасля пераходзіць да наступнай фазы.
Першая фаза ўключае ў сябе нізкаінтэнсіўную актыўнасць, напрыклад, практыкаванні на гібкасць або на дыхальную сістэму. Наступная фаза можа ўключаць лёгкую ёгу або прагулкі. Можна пачынаць з 10-15 хвілін штодня і павялічваць працягласць.
Пасля гэтых двух этапаў можна перайсці да больш інтэнсіўных нагрузак. Напрыклад, на працягу 5 хвілін займацца хуткай хадзьбой, бегам, плаваннем ці яздой на ровары, а пасля даць арганізму 5-хвілінны адпачынак. Вы не павінны адчуваць, што практыкаванні для вас цяжкія. Іх варта выконваць у тым тэмпе, калі вы ўсё яшчэ можаце падтрымліваць размову. Паступова можна дадаваць усё больш інтэрвалаў.
Чацвёртая фаза ўключае ў сябе яшчэ больш складаныя практыкаванні, але з умеранай інтэнсіўнасцю. Напрыклад, больш хуткі бег або практыкаванні з вагой цела. Пасля завяршэння гэтай фазы можна вяртацца да свайго звыклага ўзроўню актыўнасці, які быў у вас да кавіду.
Такі паступовы пераход можа падацца вельмі марудным, асабліва тым людзям, якія да кавіду былі вельмі актыўнымі. Аднак дактары пераконваюць, што менавіта паступовая нагрузка пойдзе на карысць арганізму пасля хваробы.
Мільянер Варабей атрымаў права на забудову цэнтра Мінска — узамен за дарагую клініку для Лукашэнкі7
Каментары