Арганізатара пралукашэнкаўскіх шэсцяў усё ж судзяць за збіццё суседа
25 сакавіка ў судзе Першамайскага раёна пачалі разгляд справы Сяргея Каўрыгіна. Яшчэ ў кастрычніку ён некалькі разоў ударыў у ліфце свайго суседа Сяргея Карпава. І пацярпелы, і нападнік — айцішнікі.
Відэа канфлікту нядаўна з’явілася ў сеціве. На ім бачна, як Карпаў заходзіць у ліфт, за ім спрабуе ўвайсці Каўрыгін з жонкай і дзецьмі. Пасля, меркавана, нейкай размовы з суседам (відэа без гуку), Каўрыгін некалькі разоў б’е Карпава.
У той жа дзень Карпаў напісаў заяву ў міліцыю. Ён атрымаў чэрапна-мазгавую траўму.
Заводзіць справу аб хуліганстве супраць Каўрыгіна не сталі. Але завялі лягчэйшую, за нанясенне лёгкіх цялесных пашкоджанняў.
Пасяджэнне прайшло ў судзе Першамайскага раёна. Разглядае справу суддзя Максім Трусевіч, сумна вядомы сваёй жорсткасцю прысудаў па адміністратыўках.
Абвінавачаны Сяргей Каўрыгін — таксама асоба вядомая. Ён адзін з арганізатараў акцый у падтрымку Лукашэнкі. Звычайна Каўрыгін (з вялікім крыжом у руках) узначальвае праўладныя шэсці разам са спяваком Цімурам Прахіным і экс-спецназаўцам Сяргеем Пазняком.
Праўда, ніхто з іх не прыйшоў у суд, каб падтрымаць свайго паплечніка.
На судзе ў якасці сведкі выступіла жонка Каўрыгіна. Жанчына распавяла, што ў той вечар 18 кастрычніка яны з мужам і дзецьмі вярталіся дадому, спяшаліся. Перад імі ў ліфт зайшоў сусед (Сяргей Карпаў) і паспрабаваў закрыць дзверы. Каўрыгін прытрымаў дзверы ліфта. І пачаўся канфлікт.
«Сусед хацеў перашкодзіць таму, каб мы ўвайшлі ў ліфт, гэта было заўважна. Муж прасіў яго адысці, той адказваў: чаго? У выніку перайшлі на павышаны тон размовы, сусед мацюкаўся, абураўся, маўляў, чаго я буду табе і тваёй сям’і саступаць?» — распавяла Кацярына Каўрыгіна.
Па яе словах, у нейкі момант Карпаў сказаў: «А не пайшлі б вы?» Гэта абурыла яе мужа, той загадаў сям’і выходзіць з ліфта. Жанчына павярнулася да дзяцей і самога збіцця не бачыла, але ўпэўненая, што канфлікт справакаваў сам Карпаў.
«У нас з’явіўся дамавы чат, дзе абмяркоўваюць палітыку. Я там не сяджу, але мне расказалі, што ў тым чаце пачалі цкаваць і высмейваць майго мужа, маўляў, ён падтрымлівае рэжым і ладзіць шэсці ў падтрымку ўлады», — сказала Кацярына Каўрыгіна.
Яна настойвала, што канфлікт у ліфце меў пад сабою палітычны складнік. Маўляў, раней Карпаў вітаўся з Каўрыгінымі, але апошнім часам перастаў. А за некалькі дзён да бойкі ён дэманстратыўна не паехаў на адным ліфце з яе мужам.
Відэа гэтай дэманстратыўнай непаездкі нават паглядзелі на судзе.
Акрамя таго, Каўрыгін і яго адвакатка папрасілі правесці паўторную медыцынскую экспертызу траўм збітага суседа і далучыць да справы раздрукоўку паведамленняў з таго самага дамавога чата, дзе, па выразу Каўрыгіна, «стасуюцца гэтыя рэвалюцыянеры». Гэтыя хадайніцтвы суддзя Трусевіч не задаволіў.
Пацярпелы Сяргей Карпаў у размове з «Нашай Нівай» абверг палітычны складнік канфлікту.
«У тым ліфце сапраўды не было месца, каб увайшлі яшчэ двое дарослых з чатырма дзецьмі. Персанальна я не маю ніякага негатыўнага стаўлення да Каўрыгіна, пра тое, што ён арганізуе нейкія шэсці, я ўвогуле не ведаў», — сказаў Карпаў.
На пасяджэнні ён папрасіў спагнаць з Каўрыгіна кампенсацыю за судовыя і медыцынскія выдаткі, а таксама кампенсаваць маральную шкоду. Агулам — трохі больш за 4000 рублёў.
Каўрыгін сваю віну не прызнаў. Ён паведаміў, што даход яго сям’і з чатырма дзецьмі складаецца з яго невялікага заробку і грашовай дапамогі на дзяцей. Каўрыгін запэўніў, што зарабляе ўсяго толькі 400 рублёў (хоць мае дарагое аўто BMW X6, на чым акцэнтаваў увагу адвакат пацярпелага).
Але ж у сваім апошнім слове Каўрыгін паведаміў, што штраф ён гатовы сплаціць цалкам.
Адвакат пацярпелага папрасіў суд не прызначаць Каўрыгіну штраф — бо той сам кажа, што мае мізэрны заробак, таму ад грашовых праблем у сям’і могуць пацярпець дзеці. Праз чацвярых дзяцей абвінавачанага не варта і караць арыштам, падкрэсліў адвакат. На яго думку, адэкватнае пакаранне — 240 гадзін грамадскіх прац.
Прысуд абвесцяць 26 сакавіка ў 10:20. Сяргею Каўрыгіну пагражае штраф, выпраўленчыя ці грамадскія працы на тэрмін да года альбо арышт.
Хто такі Міхаіл Мяховіч — сілавік, які вядзе канал ГУБАЗіКа і адказвае за прабіў людзей20
Каментары