Вашынгтон абвесціў пра зняццё санкцый супраць кампаніі Nord Stream 2 AG і яе гендырэктара Матыяса Варніга. Гэтае рашэнне апублічылі напярэдадні сустрэчы Блінкена і Лаўрова.
Адміністрацыя Байдэна зняла апошнюю перашкоду на шляху дабудовы газаправода «Паўночны паток-2». Вашынгтон абвесціў пра ўвядзенне санкцый супраць кампаніі Nord Stream 2 AG і яе гендырэктара Матыяса Варніга і адначасова пра іх прыпыненне «з меркаванняў нацыянальнай бяспекі».
На пабудове газаправода настойвала Германія.
Чыноўнік Дзяржаўнага дэпартамента ЗША сказаў выданню «Уол-стрыт джорнал», што прыпыненне санкцый адпавядае лініі новай прэзідэнцкай адміністрацыі ЗША на паляпшэнне адносін з саюзнікамі. Папярэдняя адміністрацыя Трампа рэзка крытыкавала Берлін за намер купляць больш расійскага газу і ўводзіла рознага тыпу санкцыі супраць «Патоку-2», якія затармазілі рэалізацыю праекта, але не забілі яго канчаткова.
Іншы чыноўнік Дзярждэпа патлумачыў, што ў ЗША няма магчымасцей спыніць праект. Сыходзячы з гэтага, Вашынгтон лічыць сваім прыярытэтам дабіцца захавання паставак газу ва Украіну.
Пазіцыя Германіі дыктуецца нацыянальнымі эканамічнымі інтарэсамі: краіне патрэбны расійскі газ для захавання энергетычнага балансу ў сітуацыі, калі пад ціскам эколагаў краіна адмаўляецца ад атамнай энергетыкі і вугалю, які дае больш выкідаў у атмасферу, чым газ.
Пасля пабудовы «Паўночнага патоку-2» Расія зможа спыніць транзіт газу праз Украіну, што будзе моцным фінансавым ударам па гэтай краіне. Патэнцыйны негатыўны эфект можа быць таксама для Славаччыны і Польшчы.
«Паўночны паток-2» — прыклад таго, калі палітычныя і эканамічныя інтарэсы ўваходзяць у супярэчнасць. Аналагічна і ў 1970-х ЗША выступалі супраць пабудовы расійскіх нафтаправодаў у Еўропу, аднак еўрапейскія лідары бачылі ў гэтым свой інтарэс.
Берлін у перамовах з Расіяй абумоўліваў неабходнасць працягу транзіту праз Украіну нават пасля ўвядзення ў дзеянне «Паўночнага патоку-2», але рэальнасць такая, што Масква зможа цяпер такі транзіт спыняць без крытычнага парушэння кантрактаў з еўрапейскімі спажыўцамі.
Пастаўкі расійскага газу для Еўропы выгадныя, але не крытычныя. Паводле еўрасаюзаўскіх стандартаў энергетычнай бяспекі, кожная краіна мае атрымліваць з адной крыніцы не больш за 30% энергарэсурсаў. Для параўнання: Беларусь залежная ў пастаўках нафты, газу, вугалю і атамнага паліва ад адной краіны, Расіі, амаль на 100%.
Для сканчэння 900-кіламетровага «Патока-2» застаецца дабудаваць каля ста кіламетраў. Пралягае ён па дне Балтыйскага мора.
65-гадовы Матыяс Варніг, які ўзначальвае зарэгістраваную ў Швейцарыі кампанію Nord Stream 2 AG, былы афіцэр ГДРаўскай спецслужбы «Штазі». Сцвярджаецца, што ён працаваў разам з Пуціным, калі той быў рэзідэнтам савецкага КГБ у ГДР.
Загінуў беларускі добраахвотнік Васіль «Дзір» Рапіцкі11
Каментары