«Дома быў ператрус, сляды ад абутку». У Мінску затрыманы фатограф Уладзь Грыдзін
У мінулым ён супрацоўнічаў з Радыё Свабода.
«Дома няма. Машына ў двары. Дома быў ператрус — брудна, раскіданыя рэчы, сляды ад абутку», — расказала сястра Уладзя Грыдзіна.
Паведамляецца, што журналіст знаходзіцца ў ІЧУ на Акрэсціна.
У мінулым Уладзь Грыдзін супрацоўнічаў з Беларускай службай радыё «Свабода». Ëн вядомы фатограф, які выстаўляўся ў Беларусі і за мяжою, атрымліваў шматлікія прафесійныя прэміі.
Сёння стала вядома таксама пра ператрус у гомельскага журналіста Анатоля Гатоўчыца і яшчэ дзясятак ператрусаў і затрыманняў ва ўсёй краіне.
У прыватнасці, у Гомелі затрыманая Ксенія Марціновіч — дачка вядомага псіхолага Алы Марціновіч, якая была вымушаныя пакінуць краіну, ратуючыся ад палітычнага пераследу.
Праваабронцы з цэнтра «Вясна» паведамляюць, што 3 лютага перастаў выходзіць на сувязь Анатоль Церашанкоў. Па інфармацыі блізкіх, ён сфатаграфаваў групу міліцыянтаў. Пасля гэтага Анатоль перастаў адказваць на званкі і паведамленні.
Таксама паведамляецца пра знікненне сувязі з Ганнай Кажэмакс. Яна была назіральніцай на выбарах у 2020 годзе. 5 лютага Ганна прыехала з Украіны ў Беларусь. У яе пад акном быў заўважаны бус з людзьмі ў форме, пасля гэтага Ганна перастала выходзіць на сувязь.
4 лютага пасля 15-сутачнага арышту з ЦІПа на Акрэсціна не выйшлі браты Ілля і Мікіта Валенціновічы. 20 студзеня іх арыштоўвалі за нібыта «непадпарадкаванне» па арт. 24.3 КаАП. Братоў перазатрымалі. Магчыма, над імі адбудзецца новы суд, але артыкул пакуль невядомы.
Што датычыць «Радыё Свабода», то сілавікі ўварваліся ў яго мінскі офіс 16 ліпеня 2021 года, вырвалі камеры відэаназірання на паверсе, выламалі трое дзвярэй у офісе ды канфіскавалі тэхніку. У той жа дзень з ператрусам прыйшлі да былых журналістаў «Свабоды» Алега Груздзіловіча, Іны Студзінскай і Алеся Дашчынскага. Іх затрымалі і пакаралі арыштам на 10 дзён.
Груздзіловіча затрымалі паўторна 23 снежня, замяніўшы меру стрымання з абавязання яўкі на ўтрыманне пад вартай, перавялі ў СІЗА на Валадарскага. Следчыя выставілі яму абвінавачанне паводле артыкула 342 Крымінальнага кодэкса — арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх.
25 лістапада быў затрыманы фрылансер «Свабоды» Андрэй Кузнечык, яму двойчы давалі па 10 сутак арышту, а потым перавялі ў СІЗА на Валадарскага па крымінальнай справе.
Затрымліваўся, але быў адпушчаны з крымінальнай справай аўтар «Свабоды» Севярын Квяткоўскі, які неадкладна пасля гэтага выехаў за мяжу. У інтэрв'ю ён заявіў, што следчых цікавіла інфармацыя пра Радыё «Свабода».
Агулам за кратамі ў Беларусі застаецца некалькі тысяч арыштаваных па палітычных матывах, сярод іх 34 журналісты, у тым ліку рэдактары самых аўтарытэтных СМІ краіны, у тым ліку «Нашай Нівы», Тут.бая і БелаПАН.
Каментары