У Мінску бракуе 2300 дактароў і медсясцёр. Вось яшчэ якія вакансіі ёсць на рынку працы
Дэфіцыт медработнікаў у Мінску стаў крытычным. На пачатак мая ў сталіцы была патрэба ў 1142 медсёстрах, паведамляе камітэт па працы, занятасці і сацабароне Мінгарвыканкама. Гэта на 95 вакансій больш, чым месяцам раней. Попыт на рабочых за апошні месяц практычна не змяніўся, ён застаецца на тым жа ўзроўні, — піша Zerkalo.io.
На пачатак мая наймальнікі ў Мінску мелі патрэбу ў 22 436 працаўніках (месяц таму — у 22 799).
Са спецыялістаў больш за ўсё неабходныя медсёстры і дактары-спецыялісты — 1142 і 919 чалавек. Для фельчараў размешчаныя 133 вакансіі.
У наймальнікаў у Мінску таксама запатрабаваныя інжынеры (744 прапановы), выхавальнікі (243), менеджары (142), настаўнікі (133), інжынеры-праграмісты (120), бухгалтары (118), эканамісты (83).
«Са спецыялістаў найбольш запатрабаваныя: медыцынскія работнікі (медыцынская сястра, лекар, памочнік лекара, правізар, рэнтгеналабарант, фармацэўт, фельчар), інжынерныя работнікі, спецыялісты ў сферы адукацыі і культуры (артыст, бібліятэкар, выхавальнік, памочнік выхавальніка, выкладчык, настаўнік), адміністратары, бухгалтары, менеджары, перакладчыкі, эканамісты, электрамеханікі, кіраўнікі арганізацый ды іх структурных падраздзяленняў, спецыялісты ў розных сферах», — расказваюць у камітэце.
Для рабочых на пачатак красавіка было 13,3 тысячы вакансій, або 59,5% ад усіх прапаноў наймальнікаў. Сярод самых запатрабаваных працаўнікоў — кухары (616 вакансій), прадаўцы (469), кіроўцы аўтамабіляў (458).
«У попыце на рабочыя кадры пераважаюць прафесіі будаўнічага профілю (муляр, маляр, тынкоўшчык, абліцоўшчык-плітачнік, слесар-сантэхнік, сталяр, электрагазазваршчык), прамысловасці (слесар механазборачных работ, токар, фрэзероўшчык, электраманцёр), транспартнай сферы (кіроўца аўтамабіля, пагрузчыка, трактарыст), гандлю і грамадскага харчавання (кантралёр-касір, афіцыянт, член брыгады аб'екта хуткага абслугоўвання (рэстарана), кухар, прадавец)», — удакладняюць у службе занятасці Мінска.
Памёр паэт Уладзімір Карызна, аўтар слоў да цяперашняга дзяржаўнага гімна Беларусі8
Каментары