Данія і Нідэрланды не будуць плаціць Расіі за газ рублямі і рыхтуюцца да спынення яго паставак
Сёння заявы пра адмову плаціць Расіі за газ рублямі зрабілі дацкая энергакампанія Orsted і нідэрландская GasTerra. Пастаўкі расійскага газу, хутчэй за ўсё, будуць імі спыненыя, але кампаніі не бядуюць, бо ўпэўненыя ў наяўнасці годных альтэрнатыў.
Найбуйнейшая энергакампанія Даніі Orsted заявіла, што не будзе рабіць плацяжы Расіі за пастаўлены газ у рублях.
Як гаворыцца ў заяве Orsted, кампанія рыхтуецца, што «Газпрам» спыніць пастаўкі. Але кампанія спадзяецца, што зможа забяспечыць альтэрнатыўныя пастаўкі на еўрапейскім аптовым рынку.
Orsted дадае, што канчатковы тэрмін плацяжу — аўторак, і кампанія працягне плаціць у еўра. Таму «існуе рызыка, што «Газпрам экспарт» спыніць пастаўкі газу», — гаворыцца ў паведамленні.
Адначасова і пастаўшчык газу ў Нідэрланды кампанія GasTerra прыняла рашэнне не выконваць патрабаванні «Газпрама» плаціць за расійскае блакітнае паліва ў рублях. Пра гэта гаворыцца ў паведамленні GasTerra. Тут таксама адзначаецца, што Расія спыніць пастаўкі з 31 мая.
«Гэта звязана з тым, што гэта можа прывесці да парушэння санкцый, уведзеных ЕС, а таксама таму, што існуе занадта шмат фінансавых і аперацыйных рызык, звязаных з неабходным варыянтам аплаты», — гаворыцца ў заяве.
Спыненне паставак азначае, што з 31 мая да 1 кастрычніка 2022 года, калі павінен скончыцца актуальны кантракт, GasTerra не атрымае каля 2 млрд кубічных метраў газу. Але як і ў дацкім выпадку, тут кампанія таксама ўпэўненая, што гэты аб'ём яна зможа без праблем атрымаць ад іншых пастаўшчыкоў.
Раней у рублях адмовіліся плаціць Расіі за газ Польшча, Балгарыя і Фінляндыя, «Газпрам» пастаўкі ім спыніў.
Цяпер чытаюць
Пракурор просіць для экс-памочніка Лукашэнкі Ігара Брыло 12 гадоў зняволення4
Каментары