Пастаўкі мяса і малака з Беларусі ў Расійскую Федэрацыю зменшыліся прыкладна на 5—7%, заявіў у інтэрв'ю ТАСС кіраўнік Рассельгаснагляду Сяргей Данкверт, пішуць «Белорусы и рынок».
Па словах расійскага чыноўніка, гэта можа быць звязана з закрыццём межаў Беларусі з Украінай і Польшчай і, адпаведна, скарачэннем аб'ёму прадукцыі, якая закупляецца там.
«Вызваленыя нішы закрываюцца за кошт унутранай вытворчасці, а для экспарту застаецца менш рэсурсаў», — сказаў Сяргей Данкверт.
Варта адзначыць, што ў пачатку 2022 года Рассельгаснагляд пры правядзенні лабараторных аналізаў прадукцыі, якая ўвозіцца з Беларусі на тэрыторыю Расіі, фіксаваў вялікую колькасць парушэнняў і неадпаведнасцяў нормам і патрабаванням заканадаўства. У выніку беларускія мяса і малако часам бракаваліся, частка тавараў не дапускалася на расійскі спажывецкі рынак.
Так, у красавіку бягучага года ў рамках маніторынгу прадукцыі жывёлагадоўлі, якая паступала ў Расію з Беларусі, было выяўлена 45 неадпаведнасцяў ветэрынарна-санітарным патрабаванням ЕАЭС. Гэты паказчык амаль у тры разы перавышае колькасць выяўленых парушэнняў заканадаўства ў першым квартале 2022 года (16 выпадкаў).
Сяргей Данкверт адзначыў, што цяпер Рассельгаснагляд пастаянна знаходзіцца на сувязі з калегамі з Беларусі. «Мы паведамляем ім пра ўсе знойдзеныя парушэнні, і яны самі прымаюць меры і рэагуюць. Пакуль мы больш адкрываем для паставак беларускія прадпрыемствы, чым закрываем», — паведаміў Данкверт.
Каментары