СМІ: Унутры расійскай арміі раскол, а Пуцін асабіста кіруе генераламі

Пуцін сам дае ўказанні генералам на месцах, заявілі дзве крыніцы, датычныя да амерыканскай разведкі. Такая тактыка кіравання ўзброенымі сіламі сведчыць пра дысфункцыянальную, неэфектыўную структуру камандавання.

Павялічыць

Перахопы разведвальнай інфармацыі зафіксавалі, як расійскія афіцэры спрачаліся паміж сабой і скардзіліся сябрам і сваякам на рашэнні маскоўскага камандавання. Існуюць значныя рознагалоссі адносна стратэгіі сярод военачальнікаў, якія спрабуюць дамовіцца пра тое, дзе засяродзіць свае асноўныя сілы.

Крамлёўскія чыноўнікі і эксперты ў дзяржаўных СМІ ліхаманкава абмяркоўваюць прычыны няўдачы пад Харкавам, і ў сваёй манеры Крэмль спрабуе перакласці віну з Пуціна на расійскіх вайскоўцаў.

Ужо адбыліся перастаноўкі ў ваенным кіраўніцтве, у выніку чаго камандная структура Расіі стала яшчэ больш бязладнай, чым была раней, кажуць крыніцы CNN.

Адзін з камандзіраў, які кіраваў большасцю падраздзяленняў вакол Харкаўскай вобласці, быў на гэтай пасадзе ўсяго 15 дзён і цяпер вызвалены ад абавязкаў. 

Амерыканскія афіцыйныя асобы лічаць, што Расія абмежаваная ў сваёй здольнасці арганізаваць адказ на контрнаступальныя аперацыі Украіны. Нават пасля абвяшчэння мабілізацыі чыноўнікі скептычна ставяцца да таго, што Расія здольная хутка разгарнуць вялікую колькасць войскаў ва Украіне, улічваючы яе пастаянныя праблемы з лініямі забеспячэння, камунікацыяй і маральным духам.

Невялікі маштаб расійскай апошняй перадыслакацыі войскаў з'яўляецца сігналам яе няздольнасці правесці любыя сур'ёзныя аперацыі, сказаў CNN высокапастаўлены прадстаўнік Мінабароны ЗША.

Расія адказала на поспехі Украіны атакамі на крытычна важную цывільную інфраструктуру: плаціны і электрастанцыі. Але гэта больш нагадвае атакі помсты, а не асэнсаваныя дзеянні, якія маюць хоць нейкую ваенную значнасць.

У расійскіх вайскоўцаў дрэнная згуртаванасць падраздзяленняў, дэзерцірства ў шэрагах, салдаты не жадаюць ваяваць. У іх жудасны маральны дух, паведамляе амерыканскае выданне. 

Распараджэнне Пуціна аб мабілізацыі мае важнае значэнне, бо гэта прамое прызнанне таго, што «спецыяльная ваенная аперацыя» Масквы не спрацавала. Нават калі Маскве ўдасца павялічыць колькасць сваіх вайскоўцаў за кошт мабілізацыі рэзервістаў, ёй будзе цяжка навучыць, арганізаваць і інтэграваць гэтыя войскі ў існуючыя падраздзяленні. Гэта, хутчэй за ўсё, не будуць навабранцы высокай якасці.

Няўдачы Расіі ў планаванні, камунікацыях і матэрыяльна-тэхнічным забеспячэнні былі ўскладненыя стратамі пры адступленні з ваколіц Харкава. 

Пуцін у сераду чарговы раз прыгразіў прымяненнем ядзернай зброі. Амерыканскія афіцыйныя асобы заявілі, што ўспрымаюць гэтую пагрозу сур'ёзна, але не ўбачылі непасрэдных прыкмет таго, што ён плануе рэалізаваць яе. 

Высокапастаўлены чыноўнік НАТА сказаў CNN, што агулам Расія цяпер знаходзіцца ў абароне. Украіна мае ініцыятыву, што прымушае Расію прыняць часовыя меры проста для таго, каб пазбегнуць далейшых страт.

• 52
• 0
• 6
• 1
• 2
• 0
• 4
• 0